दोन वर्षानंतर यात्रा:मैलारपूर खंडोबाची यात्रा उद्यापासून सुरू,‎ 5 ते 7 लाखांवर भाविक येण्याची शक्यता‎

मैलारपूर येथील खंडोबा यात्रा ही मोठी यात्रा ‎असून या ठिकाणी राज्यातूनच नव्हे तर ‎परराज्यातून देखील भाविक लाखोच्या संख्येने ‎दर्शनासाठी येतात त्यामुळे यात्रेच्या काळात श्री ‎खंडोबाचे दर्शन भाविकांसाठी सोयीचे झाले ‎पाहिजे यासाठी सर्वांनी प्रयत्न करणे गरजेचे‎ आहे असे मत तुळजापूरचे तहसिलदार‎ सौदागर तांदळे यांनी नळदुर्ग (मैलारपुर) येथे ‎यात्रेनिमित्त नळदुर्ग पोलिस ठाण्याच्या वतीने ‎ ‎ आयोजीत केलेल्या बैठकीत बोलतांना केले ‎आहे.नळदुर्ग (मैलारपुर) येथील प्रसिद्ध व ‎ ‎ ऐतिहासिक श्री खंडोबाची यात्रा ५ ते ७‎ जानेवारी दरम्यान भरत आहे. दोन वर्षानंतर‎ यावर्षी खंडोबाची यात्रा भरत आहे.

त्यामुळे‎ यावर्षी होणाऱ्या या यात्रेमध्ये पाच ते सात‎ लाख भाविक उपस्थित राहण्याची शक्यता‎ आहे.‎ त्यासाठी नगरपालिका प्रशासन, पोलिस ‎ ‎ प्रशासन व मंदिर प्रशासनाकडुन यात्रेची जय्यत ‎तयारी करण्यात आली आहे. यात्रेसंदर्भात जी ‎ ‎ नियमावली तयार करण्यात आली आहे ‎ ‎ त्यासंदर्भात माहिती देण्यासाठी नळदुर्ग पोलिस ठाण्याच्या वतीने २ जानेवारी रोजी मैलारपुर‎ येथील सभागृहात बैठकीचे आयोजन‎ करण्यात आले होते. या बैठकीच्या‎ अध्यक्षस्थानी तहसिलदार सौदागर तांदळे हे‎ होते तर नळदुर्ग पोलिस ठाण्याचे सहाय्यक‎ पोलिस निरीक्षक सिद्धेश्वर गोरे, नगरपालिकेचे‎ मुख्याधिकारी लक्ष्मण कुंभार, महावितरण‎ विभागाचे अभियंता प्रवीण‎ गायकवाड,वैद्यकीय अधिकारी डॉ. मेहताब‎ शेख,डॉ. महेश पवार, परिवहन महामंडळाचे‎ वाहतुक नियंत्रक महेश डुकरे, मंडळ‎ अधिकारी जयंत गायकवाड, यांच्यासह‎ नळदुर्ग व अणदूर येथील खंडोबाचे मानकरी,‎पुजारी व पत्रकार मोठ्या संख्येने उपस्थित‎ होते.‎

प्रारंभी मंदिर देवस्थान समितीच्या वतीने‎ सर्व मान्यवरांचा सत्कार करण्यात आला. पुढे‎ बोलतांना तहसिलदार सौदागर तांदळे यांनी‎ म्हटले की, खंडोबा यात्रेत येणाऱ्या भाविकांना‎ याठिकाणी सर्व सुविधा उपलब्ध करून‎ देण्यासाठी नळदुर्ग नगरपालिका, मंदिर समिती‎ तसेच नळदुर्ग-अणदुरकरांनी प्रयत्न केले‎ पाहिजे. प्रशासन आपल्या परीने यात्रा सुरळीत‎ पार पडण्यासाठी सर्व उपाययोजना केल्या‎ आहेत. यात्रा शांततेत पार पडण्यासाठी सर्वांनी‎ सहकार्य करावे असे आवाहनही तहसिलदार‎ सौदागर तांदळे यांनी केले.‎

‎ट्रस्टी कारभाराबद्दल नाराजी‎
तहसिलदार सौदागर तांदळे यांनी ट्रस्टीच्या‎ कारभाराबद्दल नाराजी व्यक्त केली. ट्रस्टीमध्ये‎ तहसिलदारांना घ्यावे असे ठरले होते. .मात्र‎ दीड महिना झाला ट्रस्टीने अद्याप त्याची पुर्तता‎ केली नाही. विरोधात उपोषण सुरू झाले की‎ ट्रस्टीच्या पदाधिकाऱ्यांचे अनेक फोन यायचे.‎ मात्र उपोषण संपल्यानंतर गेल्या दीड महिन्यात‎ ना ट्रस्टीच्या पदाधिकाऱ्यांचा फोन आला ना ते‎ भेटण्यासाठी आले. ट्रस्टीमध्ये तहसिलदार‎ राहिल्यास कारभारात पारदर्शकता राहते,‎ तसेच देवस्थानचा विकास होतो. त्याचबरोबर‎ लोकांचाही विश्वास वाढतो, असे ते म्हणाले.‎

मंदिराकडे येणारी वाहतूक सुरू, अवैध धंद्याबाबत पोलिसांचा इशारा‎
यावेळी बोलतांना सहाय्यक पोलिस निरीक्षक सिद्धेश्वर गोरे यांनी म्हटले की यात्रा सुरळीत पार‎ पडण्यासाठी पोलिस यंत्रणेने सर्व तयारी केली आहे. यात्रेत एकही अवैध धंदा सुरू होणार नाही.‎ यात्रेत येणाऱ्या भाविकांना कुठल्याच प्रकारचा त्रास न होता त्यांना खंडोबाचे दर्शन व्हावे यासाठी‎ उपाययोजना केल्या आहेत. यावर्षीच्या खंडोबा यात्रेत एकेरी वाहतुक सुरू करण्यात येणार असून‎ नळदुर्ग मार्गे मैलारपुरात येणाऱ्या रस्त्यावरून फक्त मंदिराकडे येणारी वाहतुक सुरू राहील तर‎ बाहेर जाण्याचा मार्ग हा बायपास रस्ता असणार आहे. यात्रा कालावधीत हे दोनच रस्ते‎ वाहतुकीसाठी सुरू राहतील इतर रस्ते वाहतुकीसाठी बंद राहणार आहेत. यात्रेत हुल्लडबाजी‎ करणाऱ्यांची गय केली जाणार नाही. यात्रा सुरळीत पार पाडण्यासाठी यात्रेकरू, भाविक व‎ नागरिकांनी सहकार्य करावे असेही यावेळी सिद्धेश्वर गोरे यांनी म्हटले आहे.‎