बदनामीची धमकी देत विवाहित महिलेवर अत्याचार:शेजारी राहणाऱ्या तरुणावर गुन्हा दाखल; हिंगोलीच्या आमलातील घटना

हिंगोली तालुक्यातील अमला येथे महिलेचे आंघोळ करतानाचे छायाचित्र सोशल मीडियावर टाकण्याची धमकी देऊन अत्याचार करणाऱ्या एका तरुणाविरुद्ध हिंगोली ग्रामीण पोलिस ठाण्यात शनिवारी ता.4 गुन्हा दाखल झाला आहे.

पोलिसांनी दिलेले माहितीनुसार आमला येथील एक महिला आंघोळ करतानाचे छायाचित्र शेजारी राहणाऱ्या परमेश्वर कोरडे याने मार्च 2021 मध्ये मोबाईल मध्ये काढले. सदर छायाचित्र सोशल मीडियावर टाकून बदनामी करण्याची धमकी त्याने महिलेस दिली. त्यानंतर परमेश्वर यांनी बदनामीची धमकी देऊन वेळोवेळी तिच्यावर अत्याचार केला. त्यानंतर त्या महिलेस जबरदस्तीने मोबाईल वापरण्यासाठी दिला. त्याच्याकडून होणाऱ्या त्रासाला कंटाळून सदर महिलेने या घटनेची माहिती तिचा पती व कुटुंबाला सांगितले. त्यानंतर महिलेच्या कुटुंबाने परमेश्वर याच्याकडे जाऊन जाब विचारला असता त्याने महिलेच्या कुटुंबाला देखील जीवे मारण्याची धमकी दिली.

या प्रकारानंतर त्या महिलेने कुटुंबासह हिंगोली ग्रामीण पोलिस ठाण्यात धाव घेतली. त्यानंतर घडलेल्या घटनेची पोलिसांकडे तक्रार नोंदवली यावरून पोलिसांनी परमेश्वर कोरडे यांच्याविरुद्ध अत्याचाराचा गुन्हा दाखल केला आहे पोलिस निरीक्षक आर. एन. मळघणे, उपनिरीक्षक एस. एम. मुपडे पुढील तपास करीत आहेत