भारत जोडो:राहुल यांनी ‘कैसी हो दीदी’ म्हणताच दांपत्य गहिवरले! ; आखाडा बाळापुरात कोल्हापुरी थाटात स्वागत

खासदार राहुल गांधी यांची यात्रा शनिवारी सकाळी आखाडा बाळापूर येथे पोहोचल्यानंतर त्या ठिकाणी यात्रा पाहण्यासाठी रस्त्यालगत उभ्या असलेल्या साधना धांडे अन् शिवा धांडे यांना बोलावून त्यांची चौकशी केली. दीदी कैसी हो, असे खा. राहुल गांधी यांनी विचारताच साधना धांडे यांच्या डोळ्यात आनंदाश्रू तरळले.

कळमनुरी तालुक्यातील दातीफाटा येथून सकाळी निघालेली यात्रा आखाडा बाळापुरात पोहोचली. या वेळी काँग्रेस प्रदेशाध्यक्ष नाना पटोले, विश्‍वजित कदम, माजी मंत्री सतेज ऊर्फ बंटी पाटील, प्रा. वर्षा गायकवाड, अमित देशमुख आदी प्रमुख नेते या यात्रेत सहभागी झाले होते. आखाडा बाळापूर येथे यात्रेेचे भव्य स्वागत करण्यात आले. ‘नफरत छोडो, भारत जोडो.. वो तोडेंगे हम जोडेंगे’च्या घोषणांनी परिसर दुमदुमला होता. या ठिकाणावरून माजी मंत्री सतेज ऊर्फ बंटी पाटील व त्यांचे कार्यकर्ते यात्रेत सहभागी झाले होते. डोक्याला फेटे बांधून सहभागी झालेले कार्यकर्ते यात्रेत चर्चेचा विषय बनले होते. दरम्यान, आखाडा बाळापुरात शेवाळा रोड भागात रस्त्यावर उभ्या असलेल्या साधना धांडे व शिवा धांडे यांना बोलावून त्यांची चौकशी केली. साधना म्हणाल्या, खासदार राहुल गांधी यांची भारत जोडो यात्रा येणार हे माहिती होते. मात्र त्यांची भेट होईल, असे स्वप्नातही वाटले नाही.

मी व माझे पती शिवा धांडे उभे होते. या वेळी खासदार गांधी यांचे लक्ष गेले अन्‌ त्यांनी आम्हाला हात दाखवून बोलावले. मात्र एवढी मोठी व्यक्ती आम्हा सामान्यांना कशाला बाेलावेल असे म्हणून दुर्लक्ष केले. मात्र त्यांनी पुन्हा बोलावल्यानंतर थोडी भीती वाटली, पण त्यांच्यापर्यंत पोहोचलो. गांधी यांनी ‘कैसी हो दीदी’, असे शब्द उच्चारताच तोंडातून शब्दही फुटेनासे झाले. डोळ्यातून आनंदाश्रू वाहू लागले. त्यांची झालेली भेट स्वप्नवतच आहे. मात्र हा अमूल्य ठेवा आम्ही आयुष्यभर जपणार असल्याचे साधना धांडे यांनी सांगितले. ऑटोचालक शिवा धांडे यांच्याशी संवाद साधताना “तुम्ही काय व्यवसाय करता, दिवसभरात किती रुपये मिळतात’ असे प्रश्न विचारून ख्यालीखुशाली विचारली.

फेटा बांधून राहुल यांचे स्वागत : सिंचन वसाहतीजवळ माजी मंत्री सतेज ऊर्फ बंटी पाटील यांच्यासह पदाधिकारी व कार्यकर्त्यांनी फेटे बांधून खासदार गांधी यांचे स्वागत केले. त्यानंतर कोल्हापूरकरांनी तेथील संस्कृतीचे दर्शन घडवले. या वेळी विविध खेळांचे प्रदर्शन घडवले. तसेच कुस्तीचेही प्रात्यक्षिक दाखवण्यात आले. खासदार गांधी यांनी कुस्तीपटूंचे कौतुक केले.