औंढा नागनाथ ते जवळाबाजार मार्गावर दोन कारची समोरासमोर धडक:एक जण ठार, 7 जखमी; तिघांची प्रकृती गंभीर

औंढा नागनाथ ते जवळाबाजार मार्गावर वगरवाडी शिवारात दोन कारची समोरासमोर धडक झाली. यामध्ये एक जण ठार तर सात जण जखमी झाल्याची घटना रविवारी रात्री घडली आहे. फहीमोद्दीन कादरी (52, रा. कळमनुरी) असे मृताचे नाव असल्याचे पोलिसांनी सांगितले. तर या अपघातातील तिघांची प्रकृती गंभीर असून त्यांना पुढील उपचारासाठी नांदेड येथे हलवण्यात आले आहे.

पोलिसांनी दिलेल्या माहितीनुसार, कळमनुरी येथील फहीमोद्दीन कादरी हे त्यांच्या कुटुंबियांसह परभणी येथे नातेवाईकांकडे कार्यक्रमासाठी गेले होते. रात्री 11 वाजण्याच्या सुमारास कार्यक्रम आटोपून परत येत असतांना जवळाबाजार ते औंढा नागनाथ मार्गावर वगरवाडी शिवारात समोरून भरधाव वेगात येणाऱ्या इर्टिगा कारने त्यांच्या कारला जोरदार धडक दिली. या अपघातात मोठा आवाज झाला. अपघातामध्ये फहीमोद्दीन यांचा जागीच मृत्यू झाला तर त्यांच्या कुटुंबातील सदस्य जखमी झाले.

या अपघाताची माहिती मिळताच हट्टा पोलिस ठाण्याचे सहाय्यक पोलिस निरीक्षक गजानन बोराटे, उपनिरीक्षक सतीष तावडे, जामदार राजू ठाकूर, सुर्यकांत भारशंकर, अंबादास बेले यांच्या पथकाने तातडीने घटनास्थळी धाव घेतली. पोलिसांनी या अपघातात जखमी झालेल्या

मोहम्मदी कादरी (45), बुशरा कादरी (25) , जैबूंनीसा कादरी( 70), सय्यद युनूस (60), तसेच जलालदाभा येथील विनोद काळे (23), सतीश हाके (23) व पेडगाव परभणी येथील ज्ञानेश्वर हाके (24) यांना तातडीने उपचारासाठी औंढा नागनाथ ग्रामीण रुग्णालयात दाखल केले आहे.

जखमींपैकी मोहम्मदी कादरी, जैबूंनीसा कादरी व बुशरा या तिघांनी प्रकृती गंभीर असल्याने त्यांच्यावर प्राथमिक उपचार करून पुढील उपचारासाठी नांदेड येथे हलविण्यात आले आहे. या प्रकरणी हट्टा पोलिस ठाण्यात अद्याप गुन्हा दाखल झाला नाही.