आयुष्यमान भारत:5 लाखांच्या मोफत उपचारासाठी‎ 57,759 पात्र, गोल्डनकार्ड वाटप‎

आर्थिकदृष्ट्या दुर्बल जनतेला मोफत‎ उपचार मिळावेत यासाठी केंद्र सरकारने‎ ‘आयुष्यमान भारत प्रधान मंत्री‎ जनआरोग्य योजना'' हाती घेतली आहे. या‎ योजनेत शहरातील ५७ हजार ७५९ पात्र‎ लाभार्थींचे गोल्डन कार्ड बनवण्यात येणार‎ आहेत. पैकी ३१ हजार ६४१ म्हणजेच‎ ५४.७८ टक्के लाभार्थींना कार्ड देण्यात‎ आले. त्यासाठी पालिकेच्या आरोग्य‎ विभागाने १ जानेवारीपासून शहरात ११६‎ ठिकाणी शिबिर घेतली. या योजनेंतर्गत‎ शासनाकडून ५ लाखापर्यंतचे उपचार‎ मोफत दिले जाणार आहेत.‎ सन २०११ मध्ये झालेल्या सर्वेक्षणानुसार‎ शहरातील ४८ वॉर्डांमध्ये लाभार्थींच्या‎ याद्या तयार केल्या होत्या.

या योजनेच्या माध्यमातून शहरातील‎ तब्बल ५७ हजार ७५९ लाभार्थींना‎ एक रुपयाही खर्च न करता‎ योजनेतून औषधोपचार घेता येतील.‎ मात्र, त्यासाठी लाभार्थींकडे गोल्डन‎ कार्ड असणे बंधनकारक आहे.‎ यासाठी पालिकेच्या आरोग्य‎ विभागाने १ जानेवारीपासून शिबिर‎ लावून ऑनलाइन कार्ड काढून‎ देण्याची योजना हाती घेतली.‎ आतापर्यंत ३१,६४१ लाभार्थींना‎ गोल्डन कार्ड मिळाले. उर्वरित २६‎ हजार ११८ लाभार्थींना फेब्रुवारी‎ अखेरपर्यंतच हे कार्ड मिळतील.‎ दरम्यान, पालिका आरोग्य‎ विभागाच्या माध्यमातून शहरातील‎ प्रत्येक प्रभागात शिबिर घेणे सुरू‎ आहे. यासाठी लॅपटॉप, इंटरनेट‎ सुविधेसह तज्ज्ञ मनुष्यबळ उपलब्ध‎ करून दिले आहे. फेब्रुवारी‎ अखेरपर्यंत हा उपक्रम सुरू राहील.‎

आवश्यकतेनुसार मार्च महिन्यातही‎ शिबिर होईल , अशी माहिती‎ वैद्यकीय अधिकारी डॉ.कीर्ती‎ फलटणकर यांनी दिली. तसेच ज्या‎ लाभार्थींना अजूनही गोल्डन कार्ड‎ मिळाले नसेल त्यांनी आवश्यक‎ कागदपत्रांची पूर्तता करून नोंदणी‎ करून कार्ड प्राप्त करून घ्यावे.‎ आरोग्यविषयक सुविधांसाठी हे‎ कार्ड अतिशय उपयुक्त असल्याचे‎ डॉ.फलटणकर म्हणाल्या.‎

‎नोंदणीसाठी आवश्यक‎ कागदपत्रे अशी‎
आयुष्यमान भारत गोल्डन कार्डसाठी‎ कुटुंबांतील सदस्यांचे आधारकार्ड,‎ रेशनकार्डआणि आधार कार्ड सोबत‎ संलग्न असलेला मोबाइल क्रमांक‎ आवश्यक आहे. पालिकेने राबवलेल्या‎ शिबिरांतून ऑनलाइन नोंदणी करुन हे‎ कार्ड लाभार्थींना दिले जात आहे.‎

काय मिळेल फायदा‎
योजनेत पात्र कुटुंबांना प्रतिवर्षी‎ आयुष्यमान भारत योजनेंतर्गत‎ मान्यताप्राप्त सरकारी व खासगी‎ रुग्णालयात संपूर्ण कुटुंबासाठी ५ लाख‎ रुपयांपर्यंतचे उपचार मोफत मिळतात.‎ १,३५० आजारांचा समावेश आहे.‎

कोण करू शकते अर्ज?‎
सामाजिक, आर्थिक, जाती गणनेच्या (एसईसीसी-२०११) यादीत नाव असलेले‎ अर्ज करु शकतात. यासाठीmera.pmj ay.gov.inया वेबसाइटवर जावून नावाची‎ खातरजमा करता येईल. नाव असेल तर ऑनलाइन व ऑफलाइन अर्ज करता येतो.‎