गैरसोय:मांगलवाडी रस्ता हरवला‎ खड्ड्यात; गैरसोय वाढली‎

तांदलवाडी फाटा ते मांगलवाडी दोन‎ किमीचा रस्ता अत्यंत खड्डेमय झाला‎ असून, हा रस्ता पूर्णपणे उखडला आहे.‎ रस्त्यावर ठिकठिकाणी मोठमोठे खड्डे‎ पडले आहेत. खराब रस्त्यामुळे‎ वाहनधारकांचे किरकोळ अपघात‎ वाढले आहेत. त्यामुळे वाहनांचे‎ नुकसान होत आहे.‎ हा परिसर केळी उत्पादनासाठी‎ प्रसिद्ध आहे. शेतात केळी भरण्यासाठी‎ अवजड वाहने येत असतात.

रस्त्यावर‎ लहान व मोठे ट्रॅक्टर, ट्रक अशा‎ अवजड वाहनांची ये-जा सुरू असते.‎ खड्डे चुकवतांना या वाहनांचे अपघात‎ होतात. रस्ता आधीच अरुंद असून‎ रस्त्यावर काटेरी झुडपे वाढली आहेत.‎ वाहनधारक तसेच रस्त्याने ये जा‎ करणारे शेतकरी-शेतमजूरांना मोठा‎ त्रास सहन करावा लागत आहे.‎ रस्त्याला साईडपट्टया नसल्यासारख्या‎ असून, त्यामुळे एसटी महामंडळाची‎ बसही बंद आहे. बांधकाम विभाग‎ तसेच लोकप्रतिनिधी याकडे दुर्लक्ष‎ करत असल्याने त्रास वाढला आहे.‎