गावात हळहळ व्यक्त:विहिरीत काेसळल्याने‎ मजुराचा जागीच मृत्यू‎

तालुक्यातील अट्रावल ग्रामपंचायतीच्या विहिरीचे‎ खोदकाम करणाऱ्या प्राैढ मजुराचा विहिरीत उतरताना हात‎ निसटल्याने विहिरीत पडून जागीच ठार झाला. वरून‎ काेसळल्याने त्यास जबर दुखापत झाली हाेती. भीमा‎ अंकात कोळी (वय ५०) असे या मजुराचे नाव आहे. या‎ दुर्दैवी घटनेवेळी विहिरीत एक तरुण काम करत होता. मात्र‎ हात निसटल्यावर काेळी काउंटरवर आदळून अडकले.‎ जर ते त्या तरुणाच्या अंगावर पडले असते तर अनर्थ‎ आेढवला असता.‎

अट्रावल येथील मुंजोबा मंदिराजवळील ग्रा.पं. विहिरीचे‎ खोदकाम सुरू आहे. खोदकामासाठी विहिरीत लखन‎ दिनकर कोळी (वय ३२) हा तरुण उतरला होता. नंतर‎ रात्री विहिरीत खोदकामासाठी भीमा अंकात कोळी हे‎ उतरत होते. परंतु अचानक त्यांचा हात निसटल्याने ते‎ विहिरीत कोसळले. विहिरीला लावलेल्या काउंटरवर ते‎ आदळल्याने त्यांना जबर दुखापत झाली. ते काउंटरवर‎ अडकून पडले. तेथेच त्यांचा मृत्यू आेढवला.

या घटनेनंतर‎ त्यांना यावल ग्रामीण रुग्णालयात नेण्यात आले. येथील‎ पोलिस ठाण्यात लखन कोळी यांच्या खबरीवरून‎ अकस्मात मृत्यूची नोंद करण्यात आली. तपास पोलिस‎ नाईक किशोर परदेशी करत आहे. मृत भीमा कोळी यांच्या‎ पश्चात वृद्ध आई, पत्नी, एक मुलगा व एक मुलगी असा‎ परिवार आहे. या घटनेने गावात हळहळ व्यक्त हाेत आहे.‎