आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

गैरप्रकार:खोटे आणि बनावट दस्तऐवज तयार करून पाचोरा पीपल्स बँकेत अपहार, तत्कालीन निवडणूक अधिकाऱ्यासह तीन जणांविरुद्ध गुन्हा दाखल

पाचोरा4 महिन्यांपूर्वी
  • कॉपी लिंक

येथील पीपल्स बँकेत सन २०११ ते १६दरम्यान तत्कालीन सहाय्यक निबंधकांनी दोन फर्मच्या माध्यमातून बनावट कागदपत्रे व खोटी बिले दाखवून १० लाख २० हजारांचा अपहार केल्याप्रकरणी पाचोरा पोलिसांत गुन्हा दाखल करण्यात आला आहे. यामुळे बँकिंग व सहकार क्षेत्रात खळबळ उडाली आहे.

पाचोरा येथील दी पीपल्स बॅँकेचे सन २०११-१२ ते सन २०१५-१६ दरम्यान शहरात निवडणुकीदरम्यान सहाय्यक निबंधक प्रताप बाबा पाडवी हे निवडणूक निर्णय अधिकारी म्हणून नियुक्त होते. त्यावेळी त्यांनी जळगाव येथील आदर्श नगरमधील श्री समर्थ टूर्स अँड ट्रॅव्हल्स व जळगाव येथील गोलाणी मार्केटमधील कपिल प्रिंटर्सचे विलास जोगेंद्र बेंडाळे यांच्याशी संगनमत करुन वेळोवेळी बँकेची फसवणूक करण्याच्या उद्देशाने बनावट दस्तावेज तयार केले. हे दस्तावेज खरे असल्याचे भासवून कपिल प्रिंटर्सच्या नावाने २ लाख ६ हजार ४२५ रुपये, समर्थ टूर अॅण्ड ट्रॅव्हल्स नावाने ४० हजार रुपये, सुपडू भादू प्राथमिक शाळेची इमारत भाड्याने दाखवून ६२ हजार २०० रुपयांचे बिल तसेच खोटे दस्तावेज व बनावट बिले दाखवून ६ लाख ५० हजार रुपये बँक खात्यातून रोखीने काढून घेतले. अशा पद्धतीने बनावट कागदपत्रे व खोटी बिले दाखवून १० लाख २० हजार ६२५ रुपयांचा अपहार केल्याचे पंकज श्रावण सोनार (पुणे) यांनी पाचोरा पोलिसांत दिलेल्या फिर्यादीत म्हटले आहे. पंकज सोनार यांच्या फिर्यादीवरून पाचोरा पोलिसांत तत्कालीन सहाय्यक निबंधक प्रताप पाडवी, समर्थ टूर्स अँड ट्रॅव्हल्स, कपिल प्रिंटर्स यांच्या विरोधात गुन्हा दाखल करण्यात आला आहे. पुढील तपास पोलिस निरीक्षक किसनराव नजन पाटील यांच्या मार्गदर्शनात पोलिस उपनिरीक्षक गणेश चौबे करत आहेत.

बातम्या आणखी आहेत...