कौतुक:मोहरदच्या सरपंचांनी 45 विधवांना वाटला पगार‎

चोपडा तालुक्यातील मोहरद येथील‎ सरपंचांनी मिळालेला पहिला पगार‎ आपल्या गावातील विधवा महिलांना‎ वाटप केला. या स्तुत्य उपक्रमाचे‎ परिसरातून कौतुक होत आहे.‎ मोहरद येथील प्रथम महिला‎ लोकनियुक्त सरपंच अंजुम रमजान तडवी‎ यांनी मिळालेला मासिक पगार गावातील‎ विधवा महिलांना देऊन त्यांचा सन्मान‎ केला. जागतिक महिला दिनाचे अाैचित्य‎ साधून तडवी यांना पहिला व दुसऱ्या‎ महिन्याचे अनुक्रमे ६ हजार रुपये गावातील‎ ४५ विधवा महिलांना वाटप केले. यावेळी‎ परिसरातील ४०० महिला उपस्थित होत्या.‎

या वेळी प्रत्येक महिलेला बोलण्याची‎ संधी देण्यात आली. या प्रसंगी धानोरा‎ येथील ग्रामपंचायत सदस्या मेघा चौधरी‎ यांनी महिला सशक्तीकरणासह‎ सावित्रीबाई फुले यांच्या कार्याची माहिती‎ दिली. सरपंच अंजुम तडवी यांनी‎ महिलांना स्वावलंबी होऊन प्रत्येक कार्यात‎ सहभागी घेत परिवार सुशिक्षित केला‎ पाहिजे. मुलींचा जन्मदर वाढावा,‎ यासाठीही प्रयत्न करावा, असे अावाहन‎ केले. या वेळी ग्रामपंचायत सदस्या‎ हफशानबाई तडवी, मेहदुल तडवी,‎ शकीला तडवी, पोलिस पाटील रजिया‎ तडवी, मेघा चौधरी, जहानुर तडवी,‎ अंगणवाडी सेविका हिराबाई महाले,‎ सुनीता पाटील, इरशाद तडवी, मदतनीस,‎ आशा वर्कर रजिया तडवी, रुक्साना‎ तडवी, किनगाव येथील अमिर‎ प्रतिष्ठानच्या शिक्षिकांसह अनेक महिला‎ उपस्थित होत्या.‎

महिलांच्या योजनांचा विशेष अभ्यास‎
ग्रामीण भागातील महिलांना समस्यांची जाण असूनही त्यांची सोडवणूक होत नसल्याचे चित्र आहे.‎ यामुळे महिलांच्या विशेष योजनांचा अभ्यास सुरु आहे. यामुळे गावातील प्रत्येक महिलेस योजनांचा‎ लाभ कसा मिळेल, यासाठी प्रयत्न करणार आहे, असे सरपंच अंजुम रमजान तडवी यांनी सांगितले.‎ गावात सध्या ब्युटी पार्लर व शिलाई प्रशिक्षण, ग्रामलक्ष्मी, माहेरची साडी अशा योजना सुरु आहेत.‎