दोन महिन्यांपूर्वी खून झाल्याचा संशय, घटनेचे गुढ वाढले‎:कन्नड घाटात झुडपांमध्ये‎ आढळला महिलेचा सांगाडा‎

तालुक्यात कन्नड घाटाच्या पायथ्याशी बोढरे‎ नियतक्षेत्रात घाणेरीच्या झुडुपाजवळ‎ अनोळखी महिलेचा सांगाडा आढळला.‎ घटनास्थळी साडी, ब्लाऊज व परकर असे‎ कपडे आढळल्याने, सांगाडा महिलेचा‎ असल्याचे निष्पन्न झाले. दोन ते तीन‎ महिन्यांपुर्वी अज्ञात आरोपीने महिलेचा खून‎ करून तिचा मृतदेह गोणपाटात टाकून तो‎ घाटाच्या पायथ्याशी फेकून दिल्याचा संशय‎ आहे. याप्रकरणी चाळीसगाव ग्रामीण पोलिस‎ स्टेशनला खुनाचा गुन्हा दाखल करण्यात‎ आला आहे.‎ बोढरेचे वनपाल दीपक जाधव हे दि.१२‎ रोजी दुपारी ४.३० वाजेच्या सुमारास जुनोने‎ जंगल भागात गस्तीवर होते.

वनरक्षक अजय‎‎‎‎‎‎‎‎ महिरे यांनी त्यांना माहिती दिली की,‎ चाळीसगाव-कन्नड महामार्ग क्रमांक २११वर‎ घाटाच्या पायथ्याजवळील दर्ग्यापासून २००‎ मीटर अंतरावर, बोढरे नियतक्षेत्रात घाणेरी‎ झुडुपाजवळ गोणपाटातून साडी बाहेर‎ आलेली असून, गोणपाटाच्या शेजारी मानवी‎ हाडे असल्याचे त्यांनी सांगितले. नंतर दीपक‎ जाधव हे घटनास्थळी गेले. त्यावेळी‎ गोणपाटाजवळ मानवी हाडे दिसली. ही‎ माहिती नंतर ग्रामीण पोलिसांना कळवली.‎

तपासाचे आव्हान‎ दोन ते तीन महिन्यापूर्वी अज्ञात व्यक्तीने खून‎ करून महिलेचा मृतदेह गोणपाटात भरून‎ घाटात टाकून दिला असावा, असा प्राथमिक‎ अंदाज आहे. त्यामुळे पोलिसांपुढे या‎ गुन्ह्याच्या तपासाचे मोठे आव्हान आहे.‎