आरामदायी‎ प्रवास:बस वाहकाने भाडे कमी असल्याने‎ एका कुटुंबाला बसमधून उतरवले‎

महाराष्ट्र परिवहन महामंडळ‎ चांगल्या सुविधा देत प्रवाशांना‎ सुरक्षित व आरामदायी‎ प्रवासासाठी बसमध्ये बसण्याचे‎ आवाहन करते. परंतु २० रुपये‎ भाडे कमी असल्यामुळे कर्मचारी‎ प्रवाशांशी कसे गैरवर्तन करतात,‎ हे एका घडलेल्या घटनेवरून‎ दिसून आले आहे. प्रवासासाठी‎ २० रुपये कमी भरल्याने एका‎ कुटुंबातील तीन सदस्यांना‎ रात्रीच्या अंधारात बस खाली‎ उतरवून सोडून दिल्याची घटना‎ घडली. या संदर्भात पीडित‎ कुटुंबाच्या नातेवाइकांनी‎ अमळनेरचे आगार व्यवस्थापक‎ इम्रान पठाण यांच्याकडे लेखी‎ तक्रार करून संबंधित‎ कर्मचाऱ्यावर योग्य ती कारवाई‎ करण्याची विनंती केली आहे.‎ धुळे येथील रहिवासी साबीर‎ शेख आणि त्यांची पत्नी रोजिना‎ त्यांच्या ५ वर्षाच्या मुलासह‎ अमळनेर बस स्थानकावरून‎ धुळे डेपोच्या बस (क्रमांक‎ ३७४६) मध्ये २८ रोजी रात्री ९‎ वाजता बसले. तिकीट‎ काढण्याची वेळ आली तेव्हा‎ शेख यांच्याकडे भाड्यासाठी‎ पुरेसे पैसे नसल्याचे त्यांच्या‎ लक्षात आले. त्यावर शेख यांनी‎ वाहकाला ऑनलाइन भाडे‎ घेण्यास सांगितले.

त्याला नकार‎ देण्यात आला. संबंधित वाहक‎ सहमत नसताना शेख यांनी‎ तिकीट देऊन उर्वरित २० रुपये‎ भाडे धुळे बसस्थानकावर भरेल,‎ असे वाहकाला सांगितले. परंतु,‎ बस वाहकाने त्यांचे म्हणणे न‎ ऐकून घेता अमळनेर शहरापासून‎ काही अंतरावर रात्री ९ वाजता‎ सर्व कुटुंबीयांना खाली उतरवून‎ दिले. त्यानंतर शेख यांनी‎ नातेवाइकाला फोन करून हा‎ प्रकार सांगितला. दरम्यान,‎ याबाबत शेख यांच्या‎ नातेवाइकाने अमळनेरचे आगार‎ व्यवस्थापक इम्रान पठाण‎ यांच्याकडे बसच्या वाहका‎ (बिल्ला क्रमांक ३७७३) विरुद्ध‎ तक्रार करून कठोर कारवाईची‎ विनंती केली. तर तत्काळ‎ कारवाई न केल्यास वरिष्ठांकडे‎ तक्रार करण्याचा त्यांनी इशारा‎ दिला आहे.‎