प्रशासनाची मदार होमगार्ड, कंत्राटी कर्मचाऱ्यांवर‎:साडेनऊ हजार कर्मचारी‎ संपात होणार सहभागी

जिल्ह्यातील तृतीय व चतुर्थ श्रेणीचे‎ ९ हजार ५०० कर्मचारी उद्या‎ मंगळवारपासून सुरू होणाऱ्या‎ बेमुदत संपात सहभागी होतील.‎ सरकारी, निमसरकारी कर्मचारी व‎‎ शिक्षक संघटना समन्वय समितीशी‎‎ संलग्न जिल्ह्यातील ५७ कर्मचारी‎ संघटना संपात असतील. संप‎ कालावधीत कामकाज ठप्प होणार‎ नाही यासाठी सर्व मदार कंत्राटी‎ कर्मचाऱ्यांवर असेल. तसेच‎ गृहरक्षक दलाच्या जवानांची मदत‎ घेतली जाईल. वरिष्ठ अधिकाऱ्यांनी‎ सोमवारी सायंकाळी बैठकीत‎ स्थितीचा आढावा घेतला.‎ राज्य सरकारी कर्मचाऱ्यांनी‎ जुन्या पेन्शनसाठी संपाचे हत्यार‎ उपसले आहे. त्यामुळे कामकाज‎ ठप्प होणार असून, सोमवारी राज्य‎ शासनाकडून दिवसभर व्हिडिओ‎ कॉन्फरन्सद्वारे आढावा घेण्यासह‎ सूचना दिल्या जात होत्या.

त्यानुसार‎ कंत्राटी कर्मचाऱ्यांना संपात‎ सहभागी होऊ नये अशी सूचना‎ झाली आहे. तसेच सर्व खाते‎ प्रमुखांना त्यांच्या अखत्यारित‎ असलेले कार्यालय सुरू ठेवण्याचे‎ आदेश आहे. जिल्हाधिकारी‎ कार्यालय, जिल्हा परिषदेत गृहरक्षक‎ दलाच्या जवानांची मदत घेण्यात‎ येणार आहे.

आरोग्य केंद्र कार्यरत‎
संपात तृतीय व चतुर्थ श्रेणीचे‎ कर्मचारी सहभागी होणार असले‎ तरी डॉक्टर, कंत्राटी कर्मचारी,‎ एनएचएमएमचे कर्मचारी संपात‎ नसल्याने ते कार्यरत असतील.‎ त्यामुळे जिल्ह्यातील सर्व आरोग्य‎ केंद्र सुरू असतील, अशी माहिती‎ देण्यात आली.‎

अधिकारी घेणार परीक्षा‎
संपात माध्यमिक, उच्च माध्यमिक‎ शाळा, कनिष्ठ महाविद्यालयातील‎ कर्मचारी सहभागी होणार आहेत.‎ त्यामुळे दहावी, बारावीच्या परीक्षेला‎ फटका बसेल. परीक्षेचे नियोजन‎ प्रथम व द्वितीय श्रेणीचे अधिकारी‎ करणार असल्याची माहिती‎ प्रशासनाने दिली. संपावर तोडगा‎ निघाला नाही तर बुधवारी होणारी‎ परीक्षा अडचणीत येऊ शकते.‎