कारभारी:महापौरसाठी प्रतिभा चौधरींचाच‎ अर्ज; बिनविरोध निवड निश्चित‎

महापालिकेत शनिवारी महापौर व‎ स्थायी समिती, महिला बालकल्याण‎ समिती सभापती, उपसभापती पदासाठी‎ अर्ज दाखल करण्याची अंतिम मुदत‎ होती. दुपारी २ वाजेपर्यंत मुदतीत‎ नगरसचिव कार्यालयात महापौर‎ पदासाठी भाजप नगरसेविका प्रतिभा‎ चौधरी, स्थायी समिती सभापतिपदी‎ किरण कुलेवार, उपसभापती पदासाठी‎ विमलबाई पाटील यांचेच अर्ज दाखल‎ झाले.

विरोधी पक्षाकडून एकही अर्ज‎ दाखल न झाल्याने महापौर, सभापती‎ यांची निवड बिनविरोध निश्चित झाली‎ असून, आता केवळ निवडीची‎ औपचारिकता राहिली आहे.‎ दुसऱ्या टप्प्यातील अडीच वर्षांसाठी‎ महापौरपदी असलेले प्रदीप कर्पे यांनी‎ मुदतीपूर्व पक्षादेशाने महापौर पदाचा‎ राजीनामा दिला आहे.

त्यामुळे महापौर‎ पदासाठी नव्याने निवडणूक घेण्यात येत‎ आहे. तर स्थायी समिती सभापती व‎ महिला बालकल्याण समिती सभापती,‎ उपसभापती यांचा एक वर्षाचा‎ कार्यकाळ पूर्ण झाल्याने त्याकरताही‎ निवडणूक दिनांक ८ फेब्रुवारी घेण्यात‎ येत आहे. या पदासाठी अर्ज दाखल‎ करण्याची मुदत दिनांक ३ व ४ फेब्रुवारी‎ दोन दिवस होती. त्यात दिनांक ३‎ फेब्रुवारी पहिल्या दिवशी कोणीही अर्ज‎ दाखल केला नाही. तर दुसऱ्या दिवशी‎ अंतिम मुदतीत दुपारी २ वाजेच्या आत‎ अर्ज दाखल केले.

या वेळी खासदार डॉ.‎ सुभाष भामरे, माजी महापौर प्रदीप कर्पे,‎ नगरसेवक सुनील सोनार, संजय जाधव,‎ बन्सी जाधव, भाजप गटनेते वालीबेन‎ मंडोरे, नगरसेविका सारिका अग्रवाल,‎ किरण कुलेवार, भाजप महिला आघाडी‎ पदाधिकारी महिला आदी उपस्थित होते.‎ दरम्यान, दिनांक २ फेब्रुवारीपासून‎ भाजपचे नगरसेवक सहलीला खोपोली‎ येथे रवाना झाले आहे. उर्वरित‎ नगरसेवक अजूनही खोपोली येथेच‎ मुक्कामी आहे.‎

महिलांना‎ संधीमुळे‎ महापालिकेत‎ महिलाराज‎
पालिकेत शनिवारी महापौर, स्थायी समिती सभापती, महिला बालकल्याण समिती सभापती,‎ उपसभापती पदासाठी अर्ज दाखल करण्याच्या अंतीम मुदतीत भाजपच्या नगरसेविकांचे‎ एकमेव अर्ज दाखल झाल्याने बिनविरोधच निवड निश्चित झाली आहे. पालिकेत ५ वर्षाच्या‎ कार्यकाळात हे शेवटचे वर्ष असुन महापाैर, स्थायी समिती सभापती पदी महिलांना भाजपने‎ संधी दिली आहे. त्यामुळे सर्वच मुख्य पदावर महिलाच पदाधिकारी असल्याने मनपात‎ महिलाराज आले आहे. महिलांच्या हाती शहरातील विकासाची सुत्रे सोपवली आहे.‎

अर्ज दाखलनंतर केला जल्लोष‎
भाजपाच्या नगरसेविकांचा अर्ज मुदतीत दाखल झाल्यानंतर‎ महापौर, स्थायी समिती, महिला बालकल्याण समिती सभापती,‎ उपसभापती पदाच्या उमेदवारांचा महापालिका आवारातच‎ पुष्पगुच्छ देेऊन पदाधिकारी व नगरसेवकांनी सत्कार केला‎ आहे. तर यावेळी फटाक्याची आतषबाजीही केली.‎

एकाच प्रभागामध्ये संधी‎
महापौर पदासाठी प्रतिभा चौधरी यांचा ‎ एकमेव अर्ज असल्याने त्यांचा विजय ‎ निश्चित आहे. प्रतिभा चौधरी प्रभाग ‎ क्रमांक ४ मधून निवडून आल्या आहेत. ‎ याच प्रभागातून महिनाभरापूर्वी ‎ उपमहापौरपदी नागसेन बोरसे यांची ‎ निवड करण्यात आली आहे. तर प्रभाग ‎ क्रमांक ७ मधील नगरसेविका किरण ‎ कुलेवार यांचीही स्थायी समिती ‎ सभापतिपदी वर्णी लागत आहे. यापूर्वी ‎ याच प्रभागातील नगरसेवक सुनील ‎ बैसाणे हे सभापती झाले होते. ‎

एमआयएमकडून घेतला होता अर्ज‎
महापालिकेत विरोधी पक्ष एमआयएम चे नगरसेवक सईद बेग‎ यांनी महापौर पदासाठी नगरसचिव कार्यालयातून अर्ज घेतला.‎ मात्र मुदतीअंतीही त्यांनी अर्ज दाखल केला नाही. सत्ताधारीचे‎ प्रयत्न ही निवडणूक बिनविरोध करण्याचे सुरु होते. त्यामुळे‎ त्याचे नगरसेवक सतत लक्ष ठेवून होते.‎