आर्थिक फटका:कांद्याला 500 रुपयांपर्यंतच भाव; खर्च‎ निघणेही अवघड; शेतकरी वर्ग संकटात‎

कापडणेसह परिसरातील शेतकऱ्यांनी‎ रब्बी हंगामात मोठ्या प्रमाणावर कांदे‎ लागवड केली आहे. शेतकऱ्यांनी एकरी‎ पंचवीस ते तीस क्विंटल उत्पन्न घेतले‎ आहे. शेतकऱ्यांना बियाणे, फवारणी,‎ निंदणी, खते रात्रंदिवस वेळोवेळी पाणी‎ देत कांद्याचे यशस्वी पीक घेतले मात्र‎ शेतकऱ्यांना कमीत कमी बाराशे रुपये प्रति‎ क्विंटल दर अपेक्षित असताना फक्त‎ पाचशे रुपये क्विंटल दर मिळत असल्याने‎ मोठे नुकसान शेतकऱ्यांचे होत आहे.‎ ‎

कापडणेसह नगाव, धमाणे, धनूर,‎ लोणकुटे, सायने, नंदाणे, बोरीस, रामी,‎ बिलाडी, कौठळ, न्याहळोद, तामसवाडी,‎ हेंकळवाडी, देवभाने, सोनगीर, सरवड,‎ बुरझडसह परिसरातील शेतकऱ्यांनी रब्बी‎ हंगामाच्या सुरुवातील मोठ्या प्रमाणावर‎ कांद्याची लागवड केली. आता सर्वत्र‎ कांद्याचे पीक तयार झाल्याने काढणी सुरू‎ आहे. मात्र कांद्याचे दर मोठ्या प्रमाणावर‎ घसरल्याने शेतकरी अडचणीत आले.‎

मोठे नुकसान सोसावे लागणार
कांद्याचे दर घसरल्याने शेतकऱ्यांना मोठे नुकसान सोसावे लागत आहे. चार महिने पिकाला‎ वाढवण्यासाठी पैसे खर्च करून व अफाट मेहनत करून एक पैसादे खील हाती येणार नाही. आता‎ शेतात पीक घ्यावे तरी कोणते असा प्रश्न पडला आहे.- किशोर एंडाईत, शेतकरी‎

केलेला खर्चही निघणे मुश्कील‎
कापडणे परिसरात मोठ्या प्रमाणावर शेतकऱ्यांनी हिवाळी कांदे लागवड केले. सद्य:स्थितीत‎ एकरी तीस ते पस्तीस क्विंटल माल निघत आहे. मात्र सध्या बाजारात कांद्याला चारशे ते‎ पाचशे रुपये क्विंटल दर मिळतोय मात्र कांदे लावणीपासून ते उत्पन्न निघेपर्यंत शेतकऱ्यांना‎ क्विंटल मागे साडे चारशे ते पाचशे रुपये खर्च आला आहे. म्हणून कष्ट करूनही यश मिळत‎ नसल्याची खंत शेतकरी कैलास नारायण माळी यांनी दिली आहे.‎

कृउबासत दाेन हजार‎ क्विंटलपर्यंत आवक‎
शेतकऱ्यांनी कांदे काढणी सुरू‎ केली आहे. कांद्याचे दर कधी‎ वाढतील याची श्वाश्वती नाही. धुळे‎ तालुक्यातील असंख्य‎ शेतकऱ्यांकडे कांदे साठवण‎ करण्याची सुविधा नाही. म्हणून‎ शेतातून कांदे काढणी झाल्यावर‎ शेतकरी परस्पर जवळ असलेल्या‎ बाजारात घेऊन जात आहेत. धुळे‎ कृषी उत्पन्न बाजार समितीमध्ये दर‎ दिवशी पंधराशे ते दोन हजार‎ क्विंटल कांदे परिसरातून येत‎ असल्याची माहिती आडत‎ दुकानदार काशिनाथ म्हस्के यांनी‎ दिली.‎