महापौर निवड:भाजपचे वीसच नगरसेवक बैठकीत‎ पण लोणावळ्याला सर्वच जाणार‎

महापौर निवडणुकीसाठी ३‎ फेब्रुवारीपासून उमेदवारी अर्ज दाखल‎ होण्यास प्रारंभ हाेईल. मनपात भाजपचे‎ बहुमत असले तरी कोणताही धोका‎ नको म्हणून उद्या गुरुवारी भाजपचे सर्व‎ नगरसेवक लोणावळा येथे जातील.‎ दरम्यान, महापौरपदासाठी इच्छुक‎ भाजपच्या नगरसेवकांनी पक्षश्रेष्ठींच्या‎ गाठीभेटी घेण्यास सुरुवात केली आहे.‎ दुसरीकडे भाजपच्या नगरसेवकांची‎ बैठक झाली.

बैठकीला निम्मेपेक्षा‎ अधिक नगरसेवक अनुपस्थित होते.‎ महापौरपदासाठी नगरसेविका प्रतिभा‎ चौधरी, हर्षकुमार रेलन व वालीबेन‎ मंडोरे यांचे नाव आघाडीवर आहे.‎ महापौरपदावर काम करण्याची संधी‎ इतरांनाही मिळावी यासाठी भाजप‎ पक्षश्रेष्ठींच्या आदेशानुसार प्रदीप कर्पे‎ यांनी महापौरपदाचा काही दिवसांपूर्वी‎ राजीनामा दिला.

त्यानंतर आता ८‎ फेब्रुवारीला नवीन महापौरांची निवड‎ होणार आहे. मनपात भाजपचे बहुमत‎‎‎‎‎‎‎‎‎‎‎‎‎‎ असले तरी महापौरपदासाठी इच्छुकांची‎ संख्या जास्त आहे. या पार्श्वभूमीवर‎ नगरसेवकांनी पक्षश्रेष्ठींच्या भेटी‎ घेण्यास प्राधान्य दिले आहे. दुसरीकडे‎ कोणताही धोका नको म्हणून अर्ज‎ दाखल करण्यापूर्वी भाजपचे सर्व‎ नगरसेवक गुरुवारी मुंबई-आग्रा‎ महामार्गावरील एका हॉटेलमध्ये एकत्र‎ जमतील. तेथून ते दुपारी लोणावळ्याला‎ जातील.

पक्ष पातळीवरून ज्या‎ नगरसेवकाचे नाव महापौरपदासाठी‎‎‎‎‎‎‎‎‎‎‎‎‎‎ निश्चित होईल तो नगरसेवक प्रमुख‎ पदाधिकाऱ्यांसह येऊन अर्ज भरेल.‎ त्यानंतर ८ फेब्रुवारीला भाजपचे सर्व‎ नगरसेवक मनपात येतील. भाजपचे‎ महानगर जिल्हाध्यक्ष अनुप अग्रवाल‎ यांच्या मार्गदर्शनाखाली नियोजन केले‎ जाते आहे. गेल्या वेळीही सर्व‎ नगरसेवकांना दमण येथे नेण्यात आले‎ होते. आताही कोणताही धोका नको‎ म्हणून नगरसेवकांना सांभाळण्याची‎ कसरत भाजप करते आहे.‎

एमआयएमची आज बैठक‎
महापौरपदाच्या निवडणुकीमुळे‎ राजकीय हालचालींना वेग आला आहे.‎ मनपात भाजपचे बहुमत असले तरी‎ विरोधी पक्ष एमआयएमतर्फे‎ महापौरपदाची निवडणूक लढवण्याची‎ शक्यता आहे. एमआयएमची उद्या‎ गुरुवारी बैठक होणार आहे. बैठकीला‎ पक्षाचे नगरसेवक व कार्यकर्ते उपस्थित‎ असतील. या बैठकीत वरिष्ठांशी‎ चर्चेनंतर निर्णय होणार आहे.‎

नियोजनासाठी बैठक‎
भाजप नगरसेवकांची राम पॅलेस येथे‎ बैठक झाली. या वेळी ५० पैकी फक्त २०‎ नगरसेवक हजर हाेते. काही नगरसेवक‎ विवाह सोहळ्याला गेल्याने आले‎ नसल्याची माहिती देण्यात आली.‎ महापौरपदासाठी उमेदवार ठरवताना‎ नगरसेवकांचे मत बैठकीत खुलेआम‎ नोंदवण्यात यावे, त्यानंतर उमेदवार‎ निश्चित करावा, अशी मागणी बैठकीत‎ काही नगरसेवकांनी केली.‎