नुकसान:अवकाळीचा मार‎; गव्हासह कांदा, हरभरा, केळी,‎ पपईलाही बसला फटका‎

खरीप हंगामात कमी पाऊस झाल्याने शिरपूर‎ व शिंदखेडा तालुक्यातील शेतकऱ्यांना‎ फटका बसला होता. त्यानंतर आता या दोन्ही‎ तालुक्याला शनिवारी झालेल्या अवकाळी‎ पावसाचा फटका बसला. दोन्ही तालुक्यात‎ सुमारे ४०० हेक्टर क्षेत्रावरील पीक आडवे‎ झाले. शिंदखेडा तालुक्यातील वरझडी‎ गावात वीज पडल्याने दोन तर शिरपूर‎ तालुक्यात एक बैल ठार झाला. दोन्ही‎ तालुक्यात सुमारे ६० लाखांचे नुकसान‎ झाल्याचा प्राथमिक अंदाज आहे.‎ शिरपूर, शिंदखेडा, धुळे तालुक्यातील काही‎ भागात शनिवारी रात्री वादळी वाऱ्यासह‎ विजांच्या कडकडाटात अवकाळी पाऊस‎ झाला. शिरपूर शहरासह तालुक्यातील‎ सांगवी, होळनांथे येथे वादळी पावसाने एक‎ तास हजेरी लावली़.

शिरपूर, थाळनेर,अर्थे,‎ बोराडी मंडळातही पाऊस झाला. दहिवद व‎ पळासनेर परिसरात गारा पडल्या. पावसामुळे‎ गहू, हरभरा, केळी, पपईला फटका बसला.‎ शिरपूर तालुक्यात साधारणपणे २०० हेक्टर‎ क्षेत्रावरील पिकांचे २० लाखांचे नुकसान‎ झाले. रोहिणी, खंबाळे परिसरातही पाऊस‎ झाला. शिंदखेडा तालुक्यातील सुकवद,‎ तावखेडा, वर्शी, दभाषी, दत्ताणे, गव्हाणे,‎ सुलवाडे, वरसूस, विरदेल, सोनेवाडी,‎ आकडसे, कमखेडा, हुंबर्डे, वरझडी,‎ सोनशेलू, विखरण, भडणे, मेथी,‎ टेभंलाय,‎ निरगुडी,‎ चिलाणे आदी भागात पाऊस‎ झाला. तालुक्यात २०० हेक्टरवरील मका,‎ १५० हेक्टरवरील गहु, ५० हेक्टरवरील‎ हरभरा, दादर व कांद्याचे नुकसान झाले.‎

कृषी, महसूल यंत्रणेचे‎ कर्मचारी फिरकले नाही
रविवारी सुटी असल्याने नुकसानग्रस्त भागाकडे महसूल, कृषी विभागाचे‎ कर्मचारी फिरकले नाही. पुढील दोन दिवस होळी व धूलिवंदनाची सुटी‎ असल्याने गुरुवारनंतर पंचनामे होण्याची शक्यता आहे. शिंदखेडा तालुक्यात‎ साधारण २०० ते २५० हेक्टर क्षेत्रातील पिकांचे नुकसान झाले.‎

शहरातही पहाटे शिडकावा‎
शहरात दोन दिवसांपासून ढगाळ वातावरण‎ असून रविवारी पहाटे व सकाळी दोन ते‎ तीन वेळा अवकाळी पावसाचा शिडकावा‎ झाला. तसेच दिवसभर ढगाळ वातावरण व‎ उन्ह, सावलीचा खेळ सुरू होता. शहरात‎ रविवारी कमाल तापमान ३७ अंश तर‎ किमान तापमान १८ अंश सेल्सिअस‎ नोंदवण्यात आले. दिवसभर उकाडा‎ जाणवत होता.
‎

शिरपूरला ४० मिमी पाऊस‎
शिरपूर तालुक्यात ४० मिलिमीटर‎ पाऊस झाला. त्यात शिरपूर मंडळात‎ १६ मिलिमीटर, थाळनेर मंडळात ३‎ मिमी, अर्थे मंडळात १६ मिमी, बोराडी‎ मंडळात ५ मिमी तर होळनांथे‎ मंडळात ५ मिमी पाऊस झाला.‎ शिंदखेडा तालुक्यातील विखरण‎ मंडळात ११ मिमी तर शेवाळे मंडळात‎ २ मिमी पाऊस झाला.‎

तीन बैलांचा झाला मृत्यू‎
शिंदखेडा आणि शिरपूर तालुक्यात दोन‎ ठिकाणी वीज पडली. सांगवी शिवारात‎ लक्ष्मीबाई खंडू गायकवाड-कोकणी यांच्या‎ शेतातील झाडाजवळ बांधलेल्या बैलाच्या‎ अंगावर वीज पडल्याने बैलाचा मृत्यू झाला.‎ शिंदखेडा तालुक्यातील वरझडी येथील‎ शेतकरी चिंता पंडित माळी यांच्या शेतात‎ बांधलेल्या बैलजोडीवर वीज ७५ हजारांच्या‎ बैलजोडीचा जागीच मृत्यू झाला.‎