सरळ प्रणाली प्रक्रिया:आधारकार्डच्या मिसमॅचमुळे विद्यार्थ्यांची‎ माहिती अपडेटसाठी शिक्षकांची दमछाक‎

शाळेतील घोळ कमी व्हावा, यासाठी‎ २०१३ पासून अस्तित्वात आलेली सरळ‎ प्रणाली मुख्याध्यापकांसह शिक्षकांची‎ डोकेदुखी ठरू लागली असून‎ आधारकार्डच्या मिसमॅचमुळे‎ विद्यार्थ्यांची माहिती अपडेट करताना‎ शिक्षकांची दमछाक होत आहे. आधार‎ कार्ड दुरुस्तीचे काम सेवाकेंद्राऐवजी‎ प्रत्येक केंद्र शाळांना दिल्यास शिक्षकांची‎ दमछाक कमी होऊन आधार‎ लिंकिंगसह सरळ प्रणालीचे काम सरळ‎ होणार असल्याच्या प्रतिक्रिया‎ शिक्षकांमध्ये उमटत आहेत.‎ शालेय शिक्षण विभागामार्फत विद्यार्थी‎ लाभाच्या विविध योजनांची‎ अंमलबजावणी केली जाते.‎ अंमलबजावणी करताना‎ शाळास्तरावरून वारंवार माहिती घ्यावी‎ लागते, ही माहिती तयार करून वरिष्ठ‎ कार्यालयास पाठवण्यास शिक्षक,‎ मुख्याध्यापक व प्रशासकीय यंत्रणा यांचा‎ बरासचा वेळ खर्च होतो.

त्यामध्ये‎ वेळेची बचत होऊन सदर वेळ‎ विद्यार्थ्यांच्या गुणवत्ता वाढीसाठी‎ उपलब्ध व्हावा यादृष्टीने विद्यार्थी माहिती‎ सरळ प्रणाली विकसित करण्यात आली‎ आहे. तसेच सदर प्रणालीमुळे विद्यार्थी‎ लाभाच्या योजनांची प्रभावीपणे‎ अंमलबजावणी करता येईल, असा उद्देश ‎ या प्रणालीचा होता. या प्रणालीमुळे ‎ शिक्षकांना हायसे वाटले होते; परंतु ‎ प्रणाली राबवताना अनेक अडचणींना ‎ सामोरे जावे लागत आहे. प्रणालीत पुन्हा ‎ २०१९ मध्ये आधारकार्ड लिंकची सक्ती ‎ करण्यात आली. यानंतर हा घोळ ‎अधिक प्रकर्षणाने जाणवू लागला.

मुख्याध्यापक हे संगणक निरीक्षर आहेत. ‎ ते वयस्क आहेत. त्यामुळे बऱ्याचशा‎ शाळेत शिक्षकांना ही लिपिकांची कामे‎ साेपवली जात असून त्यामुळे शिक्षणावर‎ त्याचा विपरित परिणाम दिसत आहेत.‎ पहिलीच्या विद्यार्थ्यांची माहिती‎ मराठीत लिहिली जाते. तसेच‎ आधारकार्डवर अनेक चुका असतात.‎ काही आधारकार्डवर जन्म वर्ष असते.‎ तर काहींच्या आडनावात घोळ असतो.‎

आधार अपडेटसाठी जातोय वेळ‎
आधार लिंक ही चांगली संकल्पना आहे. ते होणे‎ आवश्यक आहे. नंदुरबार जिल्ह्यात अनेक शाळांमध्ये‎ आधार कार्ड मिसमॅच असल्याच्या बाबी समोर येत आहेत.‎ मी स्वत: आधारकार्ड तज्ज्ञांना बोलावून माझ्याकडील‎ मिसमॅचचे प्रमाण ९९ टक्के कमी केले. सध्या आधारकार्ड‎ दुरुस्ती, अपडेशनचे काम हे सेवा केंद्राकडून केले जात‎ आहे. यामुळे विद्यार्थ्यांचा अधिक वेळ जात आहे. हेच‎ काम शाळा स्तरावर सोपवल्यास सोपे होईल.‎ -कुंदन पाटील, मुख्याध्यापक, काेकणी पाडा, ता. नंदुरबार‎

आधारकार्ड दुरुस्तीच्या दिल्या सूचना‎
आधारकार्डला प्रमाण मानून आधारकार्ड मिसमॅच दुरुस्त‎ करण्याच्या सूचना प्रत्येक मुख्याध्यापकांना केल्या आहेत.‎ आडनावातील स्पेलिंग दुरुस्त, जेंडरच्या बाबतीत दुरुस्ती‎ मुख्याध्यापकांनी कराव्यात, अशा सूचना देण्यात आल्या आहेत.‎ त्यामुळे मिसमॅचची समस्या आपोआप दुरुस्त होऊन सरळ‎ प्रणालीचा घोळ दुरुस्त होईल. या संदर्भात शाळांच्या काही‎ अडचणी असतील त्या सोडवसाठी निश्चितच शिक्षण‎ विभागाचा प्रयत्न राहणार आहे.‎ युनूस पठाण, उपशिक्षणाधिकारी, जि. प. प्राथमिक‎