होळी उत्सव:साखरेचे भाव वाढल्यामुळे यंदा हार,‎ कंगणाचे दर दोन रुपयांनी महागले‎

‎ होळी सणाच्या पार्श्वभूमीवर नंदुरबार‎ शहरात हार- कंगण बनवणाऱ्या १५‎ कारखान्यांत हार- कंगण बनवून तयार‎ असून नंदुरबारच्या हार- कंगणाला‎ गुजरात, मध्य प्रदेश व जिल्ह्यात मोठ्या‎ प्रमाणावर मागणी असते. हार- कंगणाच्या‎ कारखान्यात सुमारे २५० कामगारांच्या‎ हातांना तात्पुरत्या स्वरूपात का असेना‎ काम मिळाले आहे.‎ होळी उत्सवात साखरेच्या पाकने‎ बनवलेल्या हार- कंगणाला मोठ्या‎ प्रमाणात मागणी असते. हारून हलवाई‎ यांच्यासह शहरात १५ जणांचे हार- कंगण‎ बनवणारे कारखाने आहेत. होळीच्या २५‎ दिवसाआधी कारखाने सुरू होतात.

एका‎ कारखान्यात साधारण १० ते १५ जणांना‎ रोजगार मिळतो. तसेच प्रत्येक कारागिरांना‎ दररोज ५०० ते ६०० रुपयांचा रोज दिला‎ जातो. आठ ते नऊ तास साखरेच्या‎ पाकपासून कंगण हार बनवण्याचे काम‎ हे कारागीर करतात. एका कारखान्यात‎ साधारण ३०० ते ४०० क्विंटल हार कंगण‎ तयार होत असून, खांडबारा, चिंचपाडा,‎ अक्कलकुवा, खापर, सेलंबा,‎ कुकरमुंडा गुजरातमधील बारडोली,‎ सुरत, मध्य प्रदेशातील खेतिया,‎ पानसेमल आदी भागात नंदुरबारच्या हार‎ कंगणाला मागणी आहे.‎

किरकोळ १२० रुपये किलोचा दर : नंदुबारला १५ तर शहाद्यात २ हार‎ कंगण बनवणारे कारखाने आहेत. एका कारखान्यात साधारण ७ लाखांचे हार- कंगण,‎ बनतात. त्यामुळे सुमारे १ कोटी २० लाखांपर्यंत उलाढाल हाेत आहे. हार- कंगणची‎ किरकोळ विक्रीचे भाव १२० रुपये तर घाऊक विक्रीत ७२ रुपये किलो दर आहे.‎

यंदा घाऊक उठाव कमी‎
यंदा घाऊक व्यापाऱ्यांकडून हार‎ कंगणला उठाव नाही. गतवर्षाच्या‎ तुलनेत हार कंगणच्या दरात किलो‎ मागे दोन रुपये वाढले आहेत.‎ साखरेच्या भावात देखील दोन‎ रुपयांची वाढ झाली आहे. होळीला‎ किरकोळ व्यापाऱ्यांकडून हार‎ कंगण विक्री होतील. ग्रामीण‎ भागातील व्यापारी आमच्याकडून‎ हार कंगण खरेदी करून ती ग्रामीण‎ भागात विक्री करतात. त्यामुळे‎ शहरात ग्रामीण भागातील‎ नागरिकांची गर्दी होईल.‎- हारून हलवाई, कारखानदार, नंदुरबार‎