गुन्हा दाखल:कुकरमुंडा फाट्याजवळ चौघांनी कापसाचा ट्रक लुटला‎

चाकूचा धाक दाखवत कापसासह‎ ट्रक लुटून नेल्याची घटना २‎ फेब्रुवारी रोजी पहाटे साडे चार‎ वाजेच्या सुमारास कुकरमुंडा‎ फाटाजवळ घडली. याप्रकरणी‎ दरोड्याचा गुन्हा दाखल करण्यात‎ आला आहे.‎ बुधवार १ फेब्रुवारी रोजी कन्नड‎ तालुक्यातील चापनेर येथून कापूस‎ भरून ट्रक (एमएच-२०‎ ईजी-०७५३) ही निघाली होती.‎ गाडीवर चालक म्हणून लखन‎ अंबादास ढगे (वय ३२, रा. जांबाडा‎ टाकळी ता. गंगापूर जि. औरंगाबाद)‎ व क्लिनर मेहमूद दाऊत शेख (रा.‎ पिंपरखेड ता. चाळीसगाव) होते.‎ गुरुवारी २ फेब्रुवारी रोजी पहाटे साडे‎ चार वाजेच्या सुमारास नंदुरबार‎ येथून कुकरमुंडा फाटा येथे हा ट्रक‎ आला असता, फाट्यावर दोन जण‎ कॅन घेऊन उभे होते, त्यांनी आवाज‎ देऊन ट्रक चालकाला‎ त्यांच्याकडील डिझेल संपले आहे,‎ असे सांगितले.

मात्र चालकाने रात्र‎ असल्याने गाडी थांबवली नाही.‎ तेथून अक्कलकुवा रस्त्याकडे चार‎ ते पाच किलोमीटर गाडी पुढे गेली‎ असता कुकरमुंडा फाटा येथे‎ थांबलेल्या इसमानी त्यांच्या कडील‎ ट्रकने कापूस भरलेला ट्रकचा‎ पाठलाग केला व पुढे जाऊन ट्रक‎ पुढे त्यांची गाडी आडवी लावली.‎ त्यामुळे कापूस भरलेला ट्रक‎ चालकाने गाडी थांबवली. ट्रक‎ समोर आडव्या लावलेल्या‎ ट्रकमधून अंदाजे २५ से ३०‎ वयोगटाच्या दरोडेखोरांनी चाकू‎ काढून ट्रक ताब्यात घेत शहादा‎ रोडकडे वळवून साधारण १०‎ किलोमिटर अंतरावर धडगाव‎ रोडकडे वळवला. पुढे साधारण ७‎ किलोमिटर अंतरावर जाऊन‎ आंबागव्हाण फाटा ते रोझवा‎ पुनर्वसन गावाच्यामध्ये रोडावर ट्रक‎ थांबवूली. तेव्हा त्यांच्या ट्रकमधील‎ अन्य दोघांनी ट्रक चालक व क्लीनर‎ या दोघांना नॉयलॉन दोरीने बांधून‎ इलेक्ट्रीक डीपी जवळ बाजूला‎ बसवून जीवे मारण्याची धमकी‎ दिली. एकाने चालकाच्या खिशातून‎ १२ हजार रुपये व दोन मोबाईल‎ काढून घेतले.

त्यानंतर चारही‎ जनांनी चालकाच्या गाडीतून‎ साधारण १२ क्विंटल कापूस व‎ गाडीचे डिझेल टाकीतून साधारण‎ ६० लिटर डिझेल काढून घेऊन‎ त्यांच्या ट्रकमध्ये बसून पळून गेले.‎ सकाळी सात वाजेच्या सुमारास‎ चालकाने ११२ वर कॉल केला.‎ त्यानंतर त्या ठिकाणी पोलिस दाखल‎ झाले. याप्रकरणी चालक लखन‎ आंबादास ढगे (वय ३२, रा.जांबाडा‎ रा. टाकळी ता. गंगापूर जि.‎ औरंगाबाद) यांनी दिलेल्या‎ फिर्यादीवरून तळोदा पोलिस‎ ठाण्यात गुन्हा दाखल केला आहे.‎ तपास सहाय्यक पोलिस निरीक्षक‎ अमितकुमार बागुल करत आहे.‎