जुनी पेन्शन संप:कार्यालयांत शुकशुकाट, आरोग्यसेवा प्रभावित‎

जुनी पेन्शन लागू करा, या मागणीसाठी‎ जिल्ह्यातील ५७ संघटनांनी संपात सहभाग‎ घेतला असून, जवळपास ८ हजार ५००‎ कर्मचारी संपात उतरले आहेत. आरोग्य,‎ महसूल, कोषागार, जिल्हा पाेलिस अधीक्षक‎ कार्यालयीन कर्मचारी, जि.प.चे प्राथमिक,‎ माध्यमिक शिक्षक, अनुदानित खासगी‎ शाळेचे शिक्षक संपात सहभागी झाले आहेत.‎ त्यामुळे जिल्ह्यातील सर्वच विभागांची कामे‎ ठप्प झाली आहेत. जिल्हाधिकारी‎ कार्यालयासमोर सकाळी कर्मचाऱ्यांची गर्दी‎ होती. त्यानंतर ही गर्दी दुपारनंतर कमी झाली.‎ कर्मचाऱ्यांच्या संपाचा सर्वसामान्यांवर बिकट‎ परिणाम झाला. आरोग्य यंत्रणा ठप्प झाल्याने‎ जिल्ह्यातील ६ हजाराहून अधिक रुग्ण‎ उपचारांपासून वंचित राहिली असावीत, असा‎ अंदाज व्यक्त होत आहे. सीआयटीयू प्रणीत‎ आदिवासी विकास प्रकल्प संघटनेचे शिक्षक,‎ शिक्षकेतर कर्मचारी, राज्य सरकारी चतुर्थ‎ श्रेणी कर्मचारी संघटनेचे ५५० कर्मचारी,‎ शासकीय, निमशासकीय लिपिक हक्क‎ परिषदेचे कर्मचारी सहभागी झाले.‎

मुलाबाळांसह आंदोलनात सहभाग‎
संपात कुटुंबीयांनी आपल्या लेकराबाळांसह‎ आंदोलनात सहभाग नोंदवला. त्यांच्या हातात‎ भावनिक संदेश देणारे फलक देण्यात आल्याने‎ आंदोलनकर्त्यांत चिमुरडी मुले लक्ष वेधून घेत होती.‎

मागणी मान्य होईपर्यंत संप सुरूच‎
राज्य सरकारी कर्मचारी मध्यवर्ती संघटनेला ५७‎ संघटनांचे समन्वयक जोडले आहेत. मागणी मान्य‎ होईपर्यंत संप सुरूच राहणार आहे.‎- हेमंत देवकर, अध्यक्ष: राज्य सरकारी कर्मचारी मध्यवर्ती संघटना‎

पेन्शनरांचा पगार,‎ इतर देयकांची‎ कामे रखडली‎
तर महसूल, आरोग्य, कोषागार, आदिवासी विकास प्रकल्प, शिक्षक, शिक्षकेतर कर्मचारी, जिल्हा पोलिस अधीक्षक‎ कार्यालयीन कर्मचारी, लिपिक या सर्व कर्मचाऱ्यांची संख्या जवळपास ८ हजार ५०० एवढी असून कोषागार कार्यालयाच्या‎ कर्मचाऱ्यांनी मार्च महिन्यात संप पुकारल्याने पेन्शनरांचा पगार, इतर देयकांची कामे रखडली आहेत. महसूल कर्मचाऱ्यांच्या‎ संपामुळे उत्पन्नांचे दाखले, जातीचे दाखलेही काम ठप्प झाल्याने सर्व सामान्यांचे हाल झाले.‎

आपत्कालीन सेवा सुरू‎
जिल्ह्यात ६१ प्राथमिक आरोग्य‎ केंद्रे, २९० उपकेंद्रे, महसूल १,‎ नागरिक आरोग्य केंद्र ३,‎ पुनर्वसन दवाखाने १०,आरोग्य‎ पथक ८,आयुर्वेदिक दवाखाने ८‎ यातील सर्व कर्मचारी सहभागी‎ झाले. तर आपत्कालीन सेवा‎ सुरू ठेवण्याचा आरोग्य‎ कर्मचाऱ्यांनी निर्णय घेतला‎ आहे. जिल्ह्यातील १७००‎ आरोग्य कर्मचारी सहभागी झाले‎ आहेत, अशी माहिती जि.प.‎ आरोग्य सेवा कर्मचारी संघटनेचे‎ अध्यक्ष अभयसिंग चित्ते यांनी या‎ वेळी दिली.‎