फसवणूक:मित्राचे स्टेटस पाहून घेतलेला‎ निर्णय पडला 23 लाखांना‎

जुन्या मित्राच्या ‘स्टेटस’वर झटपट कर्ज‎ मिळवण्यासाठी संपर्क क्रमांक पाहून व्यवसाय‎ वृद्धीसाठी कर्ज मिळवू इच्छिणाऱ्या तरुणाला‎ मित्राचे ते स्टेटस खूपच महागात पडले. २३‎ लाखांहून अधिक रकमेची फसवणूक‎ झाल्यावर व्यवसाय वृद्धी तर दूरच, आत्महत्या‎ करण्याचे विचार त्याच्या मनात यायला‎ लागले. पण तो पोलिसांकडे गेला आणि‎ अखेर सोमवारी त्याला पोलिसांनी जप्त‎ केलेले १६ लाख ६० हजार रुपये परत मिळाले.‎ शहरातील सतीश गाढे असे या फसवणूक‎ झालेल्या २८ वर्षीय तरुणाचे नाव आहे. त्याने‎ कुरियरचा व्यवसाय सुरू केला असून आठ‎ शहरांमध्ये त्याच्या शाखा आहेत. या‎ व्यवसायाची वृद्धी करण्यासाठी त्याला‎ कर्जाची आवश्यकता होती. तो पूर्वी ज्या‎ कंपनीत नोकरी करीत होता त्याच कंपनीत‎ महेश चव्हाण काम करीत होता. जुलै २०२२‎ मध्ये त्याच्या समाज माध्यमावरील स्टेटस‎ मध्ये झटपट कर्ज मिळवण्यासाठीचा संपर्क‎ क्रमांक सतीशने पाहिला आणि त्यावर फोन‎ केला.

पूजा चव्हाण नावाच्या तरुणीने तो फोन‎ घेतला व ६० लाखांपर्यंत कर्ज मिळवून‎ देण्याचे आश्वासन त्याला दिले. दरम्यानच्या‎ काळात खराब झालेले सिबिल दुरुस्ती ,‎ नोंदणी आणि अन्य कारणांसाठी त्याच्याकडे‎ पैसे मागितले जात होते आणि तो ते‎ आॅनलाइन पाठवत होता. दरम्यान, तुमची‎‎‎‎‎‎‎‎‎‎‎ फाइल आरबीआय अधिकाऱ्यांनी पकडली. ते‎ गुन्हा दाखल करीत आहेत, असेही त्याला‎ सांगितले. त्यातून वाचण्यासाठी पुन्हा आठ‎ लाख मागितले . स्वत:ची कार, आई व पत्नीचे‎ दागिने विकून सतीश ते पैसे देत राहिला आणि‎ त्यानंतर कर्ज नको, पण पैसे परत द्या अशी‎ मागणी त्याने पूजाकडे केली.

त्यावेळी तिने‎ फोन घेणे बंद केले. त्यामुळे फेब्रुवारी २०२३‎ मध्ये त्याने पोलिसांकडे तक्रार नोंदवली. ती‎ सायबर क्राइमकडे आल्यावर त्यावर‎ हालचाली झाल्या व पोलिसांनी पूजाच्या घरी‎ जाऊन तिच्याकडून १६.६० लाख रुपये रोख‎ जप्त केले. शिवाय तिच्या बँंक खात्यातील‎ दोन लाख नऊ हजार रुपये फ्रिज करण्यात‎ आले आहेत. तेही त्याला परत मिळू शकतात.‎ रोख रक्कम सोमवारी पोलिस अधीक्षक एम.‎ राजकुमार यांच्या हस्ते सतीशला परत केली.‎ सायबर शाखेचे तत्कालीन निरीक्षक लीलाधर‎ कानडे, निरीक्षक अशोक उत्तेकर आणि‎ तपास अधिकारी दिगंबर थोरात उपस्थित होते.‎

रक्कम मिळाल्याने दिलासा‎
कार, सोने विकून व कर्ज काढून, उसनवार‎ पैसे घेऊन आपण ही रक्कम पूजाला दिली‎ होती. घेणेकरी ते पैसे परत मागत होते.‎ त्यामुळे आत्महत्या करण्याचे विचार डोक्यात‎ येत होते, असे सतीश गाढे याने ‘दिव्य मराठी’‎ प्रतिनिधीला सांगितले. ही रक्कम मिळाल्याने‎ दिलासा मिळाला, असेही त्याचे म्हणणे आहे.‎