बँक ग्राहक:मद्यधुंद रिक्षाचालकाने दगडाने फोडले एटीएम

काहीही कारण नसताना मद्याच्या नशेत तर्रर असलेल्या एका रिक्षाचालकाने स्वातंत्र्य चौकातील आयडीबीआय बँकेच्या एटीएमवर दगड मारुन मशीन फोडले. २५ जून रोजी मध्यरात्री १२.५० वाजता ही घटना घडली. दरम्यान, या घटनेमुळे बँकेच्या ग्राहकांसह परिसरात भीती पसरली आहे.

शहरातील स्वातंत्र्य चौकातील मोहिते कार्नरजवळील आयडीबीआय बँकेचे एटीएम आहे. त्या ठिकाणी राहूल शंकर पाटील (वय २९, रा. बोदवड) हा सुरक्षारक्षक म्हणून काम करतो. २५ जून रोजी रात्री १२.५० वाजेच्या सुमारास कृष्णा अनिल महाजन (वय २६, रा. समतानगर) हा रिक्षाचालक एटीएमजवळ आला. काहीही कारण नसताना त्याने थेट रस्त्यावरील दगड उचलून एटीएम मशीनच्या स्क्रीनवर मारून पळ काढला. त्यावेळी राहूल पाटील याने हटकले असता कृष्णा महाजन याने त्यांनाही मारहाण केली. या प्रकरणी राहूल पाटील यांनी जिल्हापेठ पोलिस ठाण्यात धाव घेवून तक्रार दिली. त्यांच्या तक्रारीवरून कृष्णा महाजन यांच्या विरोधात अदखलपात्र गुन्हा दाखल करण्यात आला. या घटनेत एटीएम मशीनचे मोठे नुकसान झाले आहे. मशीन निकामी झाल्यामुळे रविवारी ग्राहकांना त्रास सहन करावा लागला.