कमिटीचे नियोजन:बामोशी बाबांचा ६ फेब्रुवारीला उरूस;‎ जिल्हाधिकाऱ्यांना बंदाेबस्तासाठी पत्र‎

चाळीसगाव येथील हिंदू-मुस्लीम‎ एेक्याचे प्रतीक असलेल्या व शेकडो‎ वर्षांची परंपरा लाभलेल्या पीर मुसा‎ कादरी उर्फ बामोशी बाबांचा उरूस‎ फेब्रुवारी महिन्यात होणार आहे. ६‎ फेब्रुवारी रोजी संदल मिरवणूक तर‎ ७ फेब्रुवारीला तलवार मिरवणूक‎ निघेल. यावेळी राज्यभरातून भाविक‎ दाखल हाेणार आहे. दर्गाह हजरत‎ पीर मुसा कादरी बाबा यांचा वार्षिक‎ उरुस सोहळा साजरा करण्यासाठी‎ दर्गाह कमिटीने जिल्हाधिकाऱ्यांकडे‎ पोलिस बंदोबस्ताची मागणी केली‎ आहे.

याबाबत मागणीचे पत्र‎ जिल्हाधिकाऱ्यांना देण्यात आले.‎ उरुसनिमित्त ६ फेब्रुवारी सायंकाळी‎ ७ वाजेपासून संदल शरीफ (चंदन)‎ नसिरोद्दीन तमिजाेद्दीन यांचे राहते‎ घर गणेश डेअरीमागे, रथ गल्ली‎ येथून सुरुवात होईल. तेथून जुने नपा‎ कार्यालय, सराफ बाजार, आडवा‎ बाजार, अफू गल्ली, टाऊन हॉल,‎ रांजणगाव दरवाजापासून दर्गाह पर्यंत‎ मिरवणूक काढण्यात येईल.‎

शेकडो वर्षांची परंपरा : सर्वधर्म‎ समभावाचे प्रतीक असलेल्या पीर‎ मुसा कादरी बाबांच्या उर्सला ७३२‎ वर्षे पूर्ण झाली असून यंदाचे हे ७३३‎ वे वर्ष आहे. सलग तीन दिवस‎ चालणाऱ्या या उर्स यात्रोत्सवाची‎ सुरुवात बामोशी बाबांच्या‎ समाधीच्या स्नानाने होते.‎ गुलाबपाणी, दूध व सुगंधी अत्तराने‎ कबरीचे शाही स्नान केले जाते.‎ दुसऱ्या दिवशी संदल मिरवणूक‎ निघते. ही मिरवणूक वाजत गाजत‎ बाबांच्या समाधी स्थळावर‎ पोहाेचते. तिसऱ्या दिवशी तलवार‎ मिरवणूक निघते. ती उरुसचे‎ आकर्षण आहे. या मिरवणुकीला‎ राज्यभरातून भाविक येत असतात.‎ हिरव्या चुडी चादरीत गुंडाळलेली‎ ही तलवार बँडच्या सुरावटीत व‎ ढोल-ताशांच्या गजरात रात्री ९‎ वाजता समाधी स्थळी पोहाेचते.‎‎

नपा कार्यालयासमाेरुन निघेल तलवारीची मिरवणूक‎
या उरुस सर्वात मोठे वैशिष्ट्य म्हणजे पूज्य तलवार मिरवणूक ही आहे. या‎ मिरवणुकीत हजारो भाविक सहभागी होतात. ही पूज्य तलवार मिरवणूक ७‎ फेब्रुवारी रोजी सायंकाळी ५ निघेल. ही मिरवणूक न.पा. कार्यालयमोरील‎ बाळासाहेब देशमुख यांच्या घरापासून निघून टाऊन हॉलमधून दर्ग्यात जाईल.‎

तीन दिवस पाेलिसांचा‎ असेल चोख बंदोबस्त‎
८ व ९ फेब्रुवारीच्या उरुस‎ सोहळ्यानिमित्ताने विविध‎ ठिकाणाहून आलेल्या‎ भाविकांकडून चादरी मिरवणूक‎ काढल्या जातात. त्यामुळे‎ हिंदु-मुस्लीम एकात्मतेचे प्रतीक‎ असलेल्या उर्सचा कार्यक्रम‎ शांततेत पार पाडण्यासाठी बंदोबस्त‎ मिळावा, अशी मागणी पीर मुसा‎ कादरी उर्फ बामोशी बाबा दर्गाह‎ मस्जिद व कब्रस्तान ट्रस्टचे जमील‎ शेख रहेमान मुजावर, रब्बानी‎ मुजावर, अकील मुजावर‎ यांच्यासह पदाधिकाऱ्यांनी एका‎ निवेदनाद्वारे जिल्हाधिकारी अमन‎ मित्तल यांच्याकडे केली आहे.‎