दहावीचा मराठीचा पेपर:ही पहा ‘काॅपीयुक्त’ परीक्षा‎

कॉपीमुक्त अभियान यशस्वी करण्यासाठी‎ केंद्र, राज्य सरकारने मुख्याध्यापक,‎ केंद्रसंचालक, शिक्षकांना शेकडो सूचना‎ दिल्या. या सर्व सूचना पायदळी तुडवत‎ गुरुवारी दहावीच्या पहिल्याच मराठी‎ विषयाच्या पेपरला कानळद्यातील आदर्श‎ विद्यायल व कनिष्ठ महाविद्यालयात‎ शिक्षकांच्या मदतीने सामूहीक कॉपी केली‎ गेली. काॅपीमुक्त अभियानाला केराची‎ टोपली दाखवत ‘कॉपीयुक्त’ अभियानाचा‎ ‘आदर्श’ पॅटर्न या शाळेत पहायला‎ मिळाला. ‘दिव्य मराठी’च्या प्रतिनिधींनी‎ तब्बल अडीच तास या शाळेत थांबून या‎ सामूहीक कॉपीचा प्रकार चित्रित केला.‎

गुरुवारी सकाळी ११ वाजता परीक्षेला‎ सुरूवात होताच काही मिनिटात कानळदा‎ गावातील एका तरुणाने कपांउंडची भिंत‎ ओलांडून खिडकीवर चढून पहिल्या‎ माळ्यावर एका वर्गातील परीक्षार्थी‎ विद्यार्थ्यांची प्रश्नपत्रिका मागून घेतली.‎ मोबाइलमध्ये फोटो काढून प्रश्नपत्रिका‎ विद्यार्थ्याला परत केली. तत्पूर्वी वर्गांमध्ये‎ शिक्षकांनी देखील काही प्रश्नांची उत्तरे‎ विद्यार्थ्यांना तोंडी सांगितली. काही उत्तरे‎ पेन्सीलीने लिहून दिली. वर्गात गोंधळ घालू‎ नका, जवळ असलेल्या कॉप्यांमधून‎ शांततेत पेपर सोडवण्याच्या सूचना दिल्या‎ गेल्या. ‘वॉटर बाॅय’ असलेल्या तिघांकडून‎ ही माहिती ‘दिव्य मराठी’ला मिळाली.‎ त्यांचे व्हिडीओ देखील उपलब्ध आहेत.‎

काॅपी समजून खिडकीतून प्रश्नपत्रिकाही फेकली‎
जळगाव तालुका पोलिस ठाण्याचे‎ निरीक्षक रामकृष्ण कुंभार यांनी दुपारी‎ १.१५ वाजता शाळेला भेट दिली.‎ शाळेला वळसा घालुन त्यांनी कॉपी‎ पुरवणाऱ्या तरुणांना हाकलून लावले.‎ या वेळी वर्गात गोंधळ उडाला. एका‎ विद्यार्थ्याने कॉपीसह स्वत:ची‎ प्रश्नपत्रिकाही खिडकीतून खाली‎ फेकली. काही वेळाने हा प्रकार लक्षात‎ आल्यानंतर त्याला एकाने प्रश्नपत्रिका‎ खिडकीतून पोहोचवली. पोलिस‎ निरीक्षक कुंभार गेल्यानंतर परिस्थिती‎ पुर्वीसारखीच झाली. दुपारी पेपर‎ संपल्यानंतर बाहेर पडत असलेल्या ९५‎ टक्के विद्यार्थ्यांच्या चेहऱ्यावर प्रचंड‎ उत्साह झळकत असल्याचे दिसले.‎

जीव धाेक्यात घातला : कानळदा येथील अादर्श विद्यालय व कनिष्ठ महाविद्यालयातील परीक्षा केंद्राच्या खिडकीच्या पडदीवर उभे राहून अाणि जीव धाेक्यात घालून काॅप्या पुरवल्या गेल्या. जीवघेणी कसरत‎ असताना एका विद्यार्थ्याचा पाय घसरला हाेता पण सुदैवाने त्याने ताेल सावरल्याने ताे बचावला. या केंद्राच्या पेपर सुरू झाल्यापासून ते संपेपर्यंत जत्रा भरलेली हाेती. पाेलिसांचा तर धाकच संपल्याचे समाेर अाले.‎

खिडकीवर चढून गुटखाही पुरवला‎
एका विद्यार्थ्याला मित्राने खिडकीवर चढून‎ गुटख्याची पुडी दिली. ‘दिव्य मराठी’ने प्रश्नपत्रिका‎ मिळवण्यापासून ते कॉपीचा सर्व प्रकार अनुभवत‎ असताना एकाला संशय येताच त्याने पळ काढला.‎

काही परीक्षार्थी वारंवार खिडकीत येऊन डोकावत‎ होते. पेपर संपण्याच्या शेवटच्या १५ मिनिटात तर‎ विद्यार्थिनींनी कहर केला. कॉपीने पेपर सोडवल्याचा‎ आनंद त्या खिडकीत उभ्या राहून व्यक्त करत हाेत्या.‎