अध्यक्ष, उपाध्यक्षांच्या राजीनाम्यापूर्वीच खलबते‎:जिल्हा बँकेच्या अध्यक्ष‎ बदलावरून चढाआेढ‎

जिल्हा मध्यवर्ती सहकारी बँकेच्या‎ अध्यक्ष बदलाच्या विषयावरून‎ राष्ट्रवादी काँग्रेस आणि शिवसेनेच्या‎ शिंदे गटात राजकारण चांगलेच‎ तापले आहे. दाेन्ही पक्षांत विद्यमान‎ अध्यक्ष आणि उपाध्यक्षांच्या‎ राजीनाम्यापूर्वीच इच्छुकांनी‎ माेर्चेबांधणी सुरू केली आहे.‎ त्यामुळे दाेन्ही पक्षातील गट-तटांचे‎ राजकारण ढवळून निघाले आहे.‎ जिल्हा बँकेतील सत्ता‎ फाॅर्म्युल्यात राष्ट्रवादीला तीन वर्षे‎ अध्यक्षपदाची संधी मिळाली आहे.‎ या संधीत पहिले एक वर्ष‎ संपल्यानंतर आता दुसऱ्या‎ संचालकाला अध्यक्षपदाची संधी‎ मिळणार आहे.

अध्यक्षपदासाठी‎ माजी मंत्री डाॅ. सतीश पाटील,‎ संजय पवार आणि अॅड. रवींद्र‎ पाटील या तिघांची नावे चर्चेत‎ आहेत. विधानसभेचे विराेधी पक्षनेते‎ अजित पवार यांनी जिल्हा बँकेच्या‎ अध्यक्ष निवडीचे सर्वाधिकार‎ आमदार एकनाथ खडसे यांना दिले‎ आहेत. त्यामुळे आमदार खडसे या‎ तिघांपैकी कुणाच्या नावाची‎ शिफारस करणार की दुसऱ्याच‎ नावावर शिक्कामाेर्तब करणार?‎ याबाबत पक्षात उत्सुकता आहे. ६‎ फेब्रुवारी राेजी अध्यक्षांनी राजीनामा‎ दिल्यानंतर राष्ट्रवादीकडून‎ अधिकृतपणे एक बैठक बाेलावून‎ नवीन अध्यक्षांचे नाव त्यात निश्चित‎ केले जाण्याची शक्यता आहे.

जिल्हा बँकेत शनिवारी झालेल्या संचालकांच्या बैठकीमध्ये‎ अध्यक्ष गुलाबराव देवकर यांच्याकडे राजीनामा मागण्यात आला हाेता.‎ साेमवारी ते जिल्हा उपनिबंधकांकडे आपल्या अध्यक्षपदाचा राजीनामा देणार‎ आहेत. त्यांनी राजीनामा दिल्यानंतर सहकार विभागाकडून अध्यक्षपदाचा‎ कार्यक्रम जाहीर जाईल. त्यानंतर राजकीय घडामाेडींना अधिक वेग येईल.‎

शिंदेगटाच्या बैठकीकडे लक्ष : जिल्हा बँकेत शिवसेनेच्या वाट्याला‎ उपाध्यक्षपद असून, या वर्षासाठी पक्षाच्या दुसऱ्या संचालकाला संधी दिली‎ जाणार आहे. शिवसेनेच्या शिंदे गटाकडून उपाध्यक्षपदासाठी पाचाेऱ्याचे‎ आमदार किशाेर पाटील हे प्रताप हरी पाटील यांच्यासाठी आग्रही आहेत. तर‎ गेल्या वर्षी उपाध्यक्षपदासाठी प्रबळ दावेदारी केलेल्या अमाेल पाटील‎ यांच्यासाठी पाराेळ्याचे आमदार चिमणराव पाटील हे आग्रह करू शकतात.‎

महापाैर जयश्री महाजन या उद्धव ठाकरे गटात राहिल्याने त्यांना‎ संचालकांच्या संख्येने अधिक असलेल्या शिंदे गटाकडून संधी मिळण्याची‎ शक्यता नाही. शिंदेगटातील काेणाला संधी द्यायची याबाबत पालकमंत्री‎ गुलाबराव पाटील यांचा काैल महत्त्वाचा राहणार आहे. उपाध्यक्षांच्या‎ राजीनाम्यानंतर शिंदेगटाची उमेदवार निश्चितीसाठी बैठक हाेईल.‎