दिव्य मराठी विशेष:चकाकणारे रंग, काॅन्टॅक्ट लेन्सचा वापर नकाे‎

होळीचा सण भारतात मोठ्या‎ प्रमाणावर साजरा करण्यात येतो;‎ मात्र बदलत्या काळानुसार होळीचा‎ चेहराही बदलला आहे. एकेकाळी‎ हा सण फुले आणि नैसर्गिक घरगुती‎ रंगांनी खेळला जायचा, त्या जागी‎ आता चकाकणारे रासायनिक रंग‎ आले, पाण्याचे फुगे आणि‎ पाण्याच्या फॅन्सी पिचकाऱ्या आल्या‎ आहेत. हे घटक डोळ्यांसाठी इजा‎ निर्माण करतात. दरवर्षी शहरात‎ होळीला डोळ्यांना इजा होणारे‎ शंभराहून जास्त रुग्ण उपचारासाठी‎ येत असल्याचे डॉक्टरांनी सांगितले.‎ यात रेटिनाला धोका पोहाेचण्याचे‎ प्रमाण अधिक आहे.‎ धूलिवंदनाच्या आनंद लुटताना‎ रंग खेळल्यानंतर रंग सहज निघावे‎ यासाठी कोल्ड क्रिमचा जाड थर‎ तुमच्या डोळ्यांभोवती लावा.

‎त्यामुळे डोळे जेव्हा धुता तेव्हा रंग‎ सहज निघून जातो. पाण्याने रंग‎ काढताना डोळे घट्ट झाकून ठेवा.‎ कारने प्रवास करणार असाल तर‎ खिडक्यांच्या काचा लावा. काही‎ वेळा एखाद्या अनाहुताने मारलेला‎ एखादा फुगा खिडकीतून येऊन‎ डोळ्याला लागू शकतो. मुलांनाही‎ नॉन-टॉक्सिक रंग वापरण्यास सांगा.‎ तुमच्या डोळ्यांचा रंगीत‎ पाण्यापासून बचाव करण्यासाठी‎ गॉगल लावा. धूलिवंदननामुळे‎ होणाऱ्या त्रासामुळे होणाऱ्या बऱ्याच‎ इजा अशाप्रकारच्या आहेत.
‎
रंगांमुळे हा त्रास हाेऊ शकताे

‎ पारपटलावर ओरखडे निर्माण होणे,‎ डोळ्यांमध्ये रसायनांमुळे जळजळ,‎ ॲलर्जिक कंजंक्टिव्हायटिस (डोळे येणे),‎ डोळ्यावर फुगा फुटल्याने धक्का बसणे‎ आणि डोळ्याच्या आतील बाजूस रक्तस्राव‎ होणे, डोळ्याच्या भिंगाचे स्थान बदलणे,‎ रेटिना निघणे, मॅक्युलर अडेमा ला सूज येणे‎ या त्रासांचा सामना करावा लागू शकताे.‎

डाेळ्यांची काळजी घेण्याकडे लक्ष द्यावे‎
कॉन्टॅक्ट लेन्सेस होळीसाठी सुरक्षित पर्याय आहे असे‎ अनेकांना वाटते; मात्र डोळ्यात जाणारा प्रत्येक रंग ते शोषून‎ घेत असतात आणि तो एका ठिकाणी साकळतो. त्यामुळे‎ काॅन्टॅक्ट लेन्स टाळावे. कॉन्टॅक्ट लेन्सेस वापरायचेच‎ असतील तर डिस्पोसेबल कॉन्टॅक्ट लेन्स वापरावे आणि‎ धुळवड किंवा रंगपंचमी खेळून झाल्यावर ते टाकून द्यावे.‎ - डॉ.धर्मेंद्र पाटील, नेत्ररोग तज्ज्ञ, जळगाव‎

डोळ्यांना इजा झाल्यास हे करा उपाय‎
डोळ्यात रंग गेल्यास भरपूर पाण्याने डोळे धुवा.‎ डोळे लालसर होणे, वेदना होणे, जळजळ होणे किंवा‎ प्रकाशाकडे पाहण्यास त्रास होणे, अशी लक्षणे दिसत‎ असतील तर नेत्रविकार तज्ज्ञांची भेट घ्या. डोळे चोळू‎ किंवा डोळ्यांना दाब देऊन मसाज करणे टाळायला हवे.‎ डोळ्याला पाण्याचा फुगा लागला तर स्वच्छ कापडाने‎ डोळा झाका आणि तत्काळ नेत्ररोग तज्ज्ञांना दाखवा.‎