शेतकऱ्यांवर कर्जाचा पाश:जळगाव जिल्ह्यात अवैध सावकारीच्या तक्रारीत 16 टक्क्यांनी वाढ‎, बिगरशेती कर्जदार 23.57 टक्के घटले‎

जिल्ह्यात अवैध सावकारांनी‎ शेतकऱ्यांची बळकावलेली ९६ एकर‎ शेती परत करण्याची राज्यातील सर्वात‎ मोठी कारवाई झाली. त्याचा‎ सावकारांवर वचक बसण्याऐवजी‎ अवैध सावकारीच्या तक्रारीत १६ टक्के‎ वाढ झाली. दुसरीकडे परवानाधारक‎ सावकारांकडूनही बिगरशेती‎ कर्जवाटपात २२ टक्के घट झाली.‎

शेतकऱ्यांच्या भोवतीचा सावकारीचा‎ पाश वाढल्याचे चित्र आहे.‎ सन २०२२मध्ये सहकार विभागाकडे‎ अवैध सावकारीबाबतच्या ८६ तक्रारी‎ प्राप्त झालेल्या आहेत. त्याबाबत‎ तालुकास्तरावर व जिल्हा‎ उपनिबंधकांकडे सुनावण्या झाल्या.‎ रावेर, यावल तालुक्यातील १८‎ शेतकऱ्यांची सावकारांनी बळकावलेली‎ शेती परत करण्याचे जिल्हा‎ उपनिबंधकांनी सावकारांना आदेश‎ दिले.

त्या शेतीचा ताबा शेतकऱ्यांना‎ देण्यात आला. या कारवाईनंतर अवैध‎ सावकारीवर वचक बसेल, अशी‎ शक्यता वर्तवण्यात येत होती. मात्र,‎ गेल्या वर्षीच्या तुलनेत सन २०२३मध्ये‎ आतापर्यंत तालुकास्तरावर अवैध‎ सावकारीच्या १०२ तक्रारी प्राप्त झालेल्या‎ आहेत. त्यावर सुनावणी सुरू आहे.‎

सन २०२१-२२ या आर्थिक वर्षात जळगाव जिल्ह्यात ११४‎ परवानाधारक सावकारांनी १ हजार ६६७ कर्जदारांना २ कोटी‎ ८० लाखांवर बिगरशेती कर्जवाटप केल्याची सहकार‎ विभागाकडे नोंद आहे. सन २०२०-२१ मध्ये १०५ सावकारांनी‎ २ हजार १८१ कर्जदारांना ३ कोटी ५४ लाख ५१ हजार रुपयांचे‎ बिगरशेती कर्जवाटप केल्याची माहिती दिली आहे.

सावकारांचे दप्तर तपासणी हाेणार‎

परवानाधारक सावकार तारण कर्ज नऊ टक्के तर‎ विनातारण कर्ज ११ टक्के व्याजाने देतात. या सावकारांनी‎ वाटप केलेल्या पूर्ण कर्जाची माहिती सहकार विभागाला देणे‎ अपेक्षित आहे. त्यांनी कर्जवाटपाची पूर्ण माहिती दिली‎ नसल्याचीही शंका व्यक्त करण्यात येत आहे. त्यांचे दप्तर‎ सहकार विभागाकडून तपासण्यात येणार आहे. सावकारांनी‎ नियमापेक्षा जास्त व्याजाने कर्जवाटप केले असल्यास तक्रार‎ करण्याचे आवाहन सहकार विभागातर्फे करण्यात अाले.‎