बोर्डाचीच परीक्षा:आता बाहेरून नाही, आत पर्यवेक्षकच‎ सांगत होते परीक्षार्थींना प्रश्नांची उत्तरे‎

परीक्षार्थी विद्यार्थ्यांना बाहेरून काॅपी‎ पुरवण्याचे अनेक प्रकार उघडकीस‎ आल्यामुळे राज्य परीक्षा मंडळ‎ आधीच ‘नापास’ झालेले असताना‎ आता तर थेट पर्यवेक्षकच दहावीच्या‎ परीक्षार्थींना प्रश्नांची उत्तरे सांगत‎ असल्याचे ‘दिव्य मराठी’ने केलेल्या‎ स्टिंग आॅपरेशनमध्ये चित्रित झाले‎ आहे. यावल तालुक्यातील साकळी‎ गावातील या परीक्षा केंद्रात सोमवारी‎ पालक आणि काॅपी पुरवणाऱ्यांचा‎ मुक्त संचारही तितक्याच स्पष्टपणे‎ चित्रित झाला आहे.‎

साेमवारी इयत्ता दहावीच्या‎ विद्यार्थ्यांची बीज गणित विषयाची‎ परीक्षा होती. शहरी भागातील‎ गैरप्रकार उघडकीस आल्यानंतर‎ ग्रामीण भागात त्यापेक्षा अधिक‎ गंभीर प्रकार सुरू असल्याचेही‎ ‘दिव्य मराठी’ने १२ वीच्या परीक्षांत‎ दाखवून दिले होते. दहावीच्या‎ परीक्षांतही असेच गैरप्रकार ग्रामीण‎ भागात सुरू आहे, अशी माहिती‎ मिळाल्यानंतर साकळी त शारदा‎ विद्यामंदिर व कनिष्ठ महाविद्यालय‎ या परीक्षा केंद्राला सोमवारी भेट‎ दिली. तेव्हा हे गैरप्रकार समोर आले.‎ ‘दिव्य मराठी’चे प्रतिनिधी सकाळी‎ १० वाजता केंद्रावर आले.

केंद्राच्या आवारात मुक्त संचार‎
परीक्षा केंद्राच्या परीसरात इतरांना प्रतिबंध‎ करण्यात आला असला आणि तसा आदेश‎ जिल्हाधिकाऱ्यांनी काढला असला तरी या‎ शाळेच्या आवारात मुले आणि पालकही‎ परीक्षा काळात मुक्त संचार करीत होती.‎ तसाच मुक्त संचार करीत थेट परीक्षा केंद्राच्या‎ दाराशी जात चित्रिकरण करणे त्यामुळेच‎ ‘दिव्य मराठी’ला शक्य झाले. त्यात मुक्तपणे‎ इकडे तिकडे फिरणारे चित्रित झाले आहेत.‎ अर्थात इथे काॅपीयुक्त वातावरण हाेते.‎

पर्यवेक्षक म्हणाले, टेन्शन नाही‎
बाहेरून आलेल्या एका मुलाने एका‎ पर्यवेक्षकाला प्रश्नपत्रिकेचा फोटो मोबाईलमध्ये‎ काढू देण्याची विनंती केली. त्यावर ते पर्यवेक्षक‎ म्हणाले, ‘‘प्रश्नपत्रिकेचा फोटो घेऊन काय‎ करशाल. अपेक्षितमध्ये काहीच नाही. मी स्वत:‎ पाहतोय (शोधतोय). सर्वांना उत्तरे येताय.‎ तुमच्या फोटोसाठी या सर्वांचे नुकसान करू‎ नका. इथे काही टेन्शन नाही. सगळं भेटतं मधे.‎ उलट कोणाच काही राहिलं असेल तर‎ आम्हीच विचारून घेतो.‎

पर्यवेक्षकच जेव्हा‎ ‘गाइड’ बनतात‎
त्या शाळेत १० वीची परीक्षा‎ सुरू आहे असे कोणतेही‎ लक्षण दिसत नव्हते.‎ वर्गखोल्यांच्या खिडक्यां-‎ भोवती मुलांचे कोंडाळे‎ परीक्षा सुरू होऊन संपेपर्यंत‎ उभे होते. कोणी बाहेरून‎ गणिते सोडवून आणलेले‎ कागद आत देत होते तर‎ कोणी काॅपी करताना धीर‎ देण्याचे काम करीत होते.‎ त्यामुळे छुप्या कॅमेऱ्यासह‎ ‘दिव्य मराठी’ टीमनेही त्या‎ खिडक्या गाठून डोकावले‎ तेव्हा वर्गातील पर्यवेक्षकच‎ प्रश्नपत्रिकेतील प्रश्नांची‎ उत्तरे सांगत होते. त्यांच्या‎ आवाजासह तो सर्व प्रकार‎ चित्रित झाला आहे.‎