मारहाण:"आरोपींची पाठराखण करणाऱ्यांवर कारवाई करा''‎

तालुक्यातील जामोद येथील काही लोकांनी‎ जुन्या वादातून अश्लील व जातीवाचक‎ शिविगाळ केली. तसेच मारहाण करून‎ लुटले. परंतु स्थानिक पोलिसांनी आरोपींशी‎ संगनमत करून त्यांना पाठीशी घालण्याचा‎ प्रकार केला आहे. त्यामुळे त्यांच्यावर‎ कारवाई करण्यात यावी, अशी तक्रार‎ करमोडा येथील रणजितसिंग दगडू डाबेराव‎ यांनी २८ फेब्रुवारी रोजी एका निवेदनाद्वारे‎ जिल्हा पोलिस अधीक्षक यांच्याकडे केली‎ आहे. सात दिवसांच्या आत न्याय न‎ मिळाल्यास पोलिस ठाण्यासमोर उपोषण‎ करण्यात येईल असा इशाराही त्यांनी दिला‎ आहे.‎

त्यांनी दिलेल्या तक्रारीनुसार, मागील १४‎ फेब्रुवारी रोजी रात्री साडे नऊ वाजेच्या‎ सुमारास जामोद येथील बस स्टॉप वरील‎ गावंडे यांच्या दुकानासमोर संजय दलाल,‎ प्रतिक ढगे, आकाश ढगे, वैभव ढगे, राजू‎ दलाल व इतर पंधरा ते विस लोकांनी जुन्या‎ वादातून जातीवाचक शिवीगाळ व लोखंडी‎ पाईप, तलवार, फायटर व लाथाबुक्यांनी‎ मारहाण करून जखमी केले आहे. तसेच‎ पॅण्टच्या खिशातील रोख १८०० रुपये‎ जबरीने काढून घेतले. यावेळी उपस्थित‎ नागरिकांनी मध्यस्थी करून वरील‎ लोकांच्या तावडीतून माझी सुटका केली.‎ घडलेला प्रकार हा बस स्टँड जामोद येथील‎ सीसीटीव्ही कॅमेऱ्यात कैद झाला आहे.

या‎ घटनेची तक्रार देण्यासाठी पोलिस ठाण्यात‎ गेलो असता, तेथील चौधरी नामक पोलिस‎ अधिकारी व गव्हाळे बीट जमादार जामोद‎ व समाधान दामधर यांनी मलाच अश्लील‎ भाषेत शिविगाळ करून व जबरदस्तीने‎ आपसनाम्यावर सह्या करण्यास भाग‎ पाडले. त्यामुळे भविष्यात वरील‎ गैरअर्जदारापासून मला व माझ्या कुटुंबास‎ धोका निर्माण झाला आहे. तसेच ज्या‎ व्यक्तींनी वरील गैरअर्जदाराच्या तावडीतून‎ माझी सुटका केली आहे, त्यांच्या जीवितास‎ सुध्दा धोका निर्माण झाला आहे. त्यामुळे या‎ प्रकरणाची सखोल चौकशी करुन कारवाई‎ करण्यात यावी, अन्यथा पोलिस‎ ठाण्यासमोर आंदोलन करण्यात येईल,‎ असा इशारा रणजीतसिंह डबेराव यांनी‎ दिला आहे.‎