अवकाळीचे ढग:आज मराठवाडा-विदर्भात वादळी पावसाचा अंदाज; मंगळवारी गारपिटीचीही शक्यता

महाराष्ट्रावर अवकाळी पावसाचे ढग घाेंगावत आहेत. दोन दिवस उत्तर महारा‌ष्ट्रात अवकाळी पावसाने हजेरी लावली. पुढील २ दिवस मराठवाडा-विदर्भ भागांवर वादळी पावसाचे संकट आहे. ७ मार्चला दाेन्ही विभागांत गारपिटीची शक्यता हवामान विभागाने वर्तवली आहे.

कारण : राज्यात पश्चिमी विक्षाेभामुळे आर्द्रतायुक्त वाऱ्यांच्या प्रभावाने अवकाळीची स्थिती निर्माण झाली आहे. राज्यात कमाल तापमान ३८ अंशापुढे जात असताना ४ मार्चपासून वातावरण ढगाळ झाले आहे. सुरुवातीला केवळ उत्तर महाराष्ट्रापुरत्या असलेल्या अवकाळीच्या संकटाने निम्मा महाराष्ट्र व्यापला आहे.

इशारा : ६ मार्चला मध्य महाराष्ट्रासह विदर्भ व मराठवाड्यात पाऊस तर ७ मार्चला गारपीट हाेऊ शकते. ८ मार्चनंतर अवकाळीचे वातावरण निवळू शकते.

धुळ्यात गारपिटीने केळीची बाग भुईसपाट, नाशकातही पाऊस
धुळे | शिंदखेडा, शिरपूर तालुक्यात वादळी वाऱ्यासह अवकाळी पाऊस झाला. यात गहू, हरभरा व इतर पिकांचे नुकसान झाले. वरझडीत वीज पडून दोन बैलाचा मृत्यू झाला. हिंगोणीत केळीच्या बागेतील रोपे कोसळली. दहिवदला गारपिटीने पिकांचे नुकसान झाले. दरम्यान, नाशिक जिल्ह्यातील हरसूल, अभोणा, डांगसौंदाणे परिसरात पाऊस पडला.