अंतर्गत वाद चव्हाट्यावर:श्री संत बाळूमामा ट्रस्टचे ट्रस्टी भर रस्त्यातच भिडले, दे दणादण फ्री स्टाइल हाणामारी

लाखो भक्तांचे श्रद्धास्थान असणाऱ्या कोल्हापूर जिल्ह्यातील बाळूमामा देवस्थान ट्रस्टचा गैरकारभार आणि ट्रस्टी नेमणुकीचा मोठा वाद आज रस्त्यावर आला. या वादातून कोल्हापूर शहरातील मुख्य रस्त्यावर फ्री स्टाइल मारहाण झाली.

अंतर्गत वाद चहाट्यावर

विरोधकांकडून आदमापूरचे सरपंच आणि त्यांच्या साथीदारांना मारहाण करण्यात आली आहे. मंदीरात सुरू असलेल्या गैरकारभार आणि गैरव्यवहाराविरोधात आदमापूरचे सरपंच विजय गुरव हे वकिलांची भेट घ्यायला कोल्हापुरात आले होते. यावेळी हा प्रकार घडला. यामुळे श्री संत बाळूमामा ट्रस्टमध्ये सुरू असलेला अंतर्गत वाद हा आता चव्हाट्यावर आला आहे.

सध्या ट्रस्टवर १२ ट्रस्टी

श्री क्षेत्र संत बाळूमामा मंदिरातील वाद रस्त्यावर आला असून ट्रस्टी नेमणूक, कार्याध्यक्ष नेमणूक यामध्ये दोन गट पडले आहेत. श्री सद्गुरू संत बाळूमामा देवालय ट्रस्टची स्थापना २००३ मध्ये झाली. यात एकूण १८ ट्रस्टी आहेत. यापैकी ६ ट्रस्टींचे निधन झाले असून गेल्याच महिन्यात कार्याध्यक्ष राजाराम मगदूम यांचेही निधन झाले आहे. यामुळे सध्या ट्रस्टवर एकूण १२ ट्रस्टी राहिले आहेत.

वकीलांना भेटायला येताच हल्ला

ट्रस्टी नेमणूक आणि मंदिरामध्ये सुरू असलेल्या गैरकारभाराविरोधात आदमापूरचे सरपंच विजय गुरव यांनी धर्मादाय आयुक्तांकडे तक्रार दाखल केली आहे. या संदर्भात त्यांच्या वकिलांना भेटायला आले असता त्यांच्या विरोधातील मानद अध्यक्ष धैर्यशील भोसले आणि त्यांच्या साथीदारांनी त्यांच्यावर हल्ला केला. त्यावेळी देवस्थान ट्रस्टचे मानद अध्यक्ष धैर्यशील भोसले त्याचे समर्थक आणि सरपंच विजय गुरव यांच्यामध्ये जोरदार हाणामारी पाहायला मिळाली.

सरपंच विजय गुरव यांना मानद अध्यक्ष धैर्यशील भोसले याच्या समर्थकांनी जोरावर मारहाण केली. भोसले गटाच्या समर्थकांनी सरपंच गुरव हे गावचं आणि ट्रस्टचं नाव बदनाम करत असल्याचा आरोप केलाय. तर देवस्थान समितीच्या ट्रस्टचा कारभार चुकीच्या पद्धतीने करून बेकायदेशीरपणे ट्रस्टीची नेमणूक करण्यात आली आहे. त्याचबरोबर कार्याध्यक्षांची नेमणूकही बेकायदेशीर झाली आहे, असा गंभीर आरोप सरपंच विजय गुरव यांनी केला आहे.