अशक्य हद्दीची गोष्ट:पराकोटीच्या हट्टामुळेच सुधा मूर्तींनी घेतली संभाजी भिडेंची भेट; टिकलीवादानंतर नवाच प्रकार समोर

‘इन्फोसिस फाउंडेशन’च्या प्रमुख सुप्रसिद्ध लेखिका आणि समाजसेविका सुधा मूर्ती यांनी शिवप्रतिष्ठान संघटनेचे अध्यक्ष संभाजी भिडे यांच्या घेतलेल्या भेटीचा आणखी एक ट्विस्ट समोर आला आहे. भिडे यांनी पराकोटीचा हट्ट धरल्यामुळे त्यांना त्यांना मूर्ती यांनी भेट दिल्याचा खुलासा कार्यक्रमाच्या आयोजकांनी केला आहे.

संभाजी भिडे यांनी नुकतेच एका महिला पत्रकाराशी बोलताना वादग्रस्त वक्तव्य केले. तू टिकली लावल्यासच तुझ्याशी बोलेन असे वक्तव्य केले. त्यामुळे ते चर्चेत आहेत. त्यानंतर सोमवारी सुप्रसिद्ध लेखिका सुधा मूर्ती यांनी त्यांची भेट घेतल्याने त्यांच्यावर टीकेची झोड उडाली. मात्र, आता या प्रकरणाला वेगळेच वळण मिळाले आहे.

सुधा मूर्ती यांनी सोमवारी कुरुंदवाड इथल्या आपल्या जुन्या घराला भेट दिली. त्यानंतर सांगलीत झालेल्या एका कार्यक्रमाला हजेरी लावली. या कार्यक्रमात त्यांची संभाजी भिडे यांची भेट झाली. यावेळी त्या भिडे यांच्या पाया पडल्या. या भेटीची भरपूर चर्चा झाली. मात्र, या भेटीचा एक नवीनच ट्विस्ट समोर आलाय. आयोजकांपैकी एक आणि कवयित्री असलेल्या योजना यादव यांनी स्वतः फेसबुक पोस्ट करून या भेटीबाबत खुलासा केलाय. मात्र, त्यानंतर काही वेळाने त्यांनी ही फेसबुक पोस्ट डिलिट केली. ही फेसबुक पोस्ट जशीच्या तशी...

योजना यादव आपल्या पोस्टमध्ये म्हणतात की, ही हद्द झाली. अशक्य हद्द. सुधा मूर्तींच्या कार्यक्रमाचं नियोजन सुरू होतं. तेव्हापासून दिवसाला भिडेंकडून दोन-तीन फोन येत होते. सुधाताईंनी आधीच कुणाला भेटणार नसल्याचं सांगितलं होतं. पण हे महाशय हट्टाला पेटले होते. आम्ही ऑफिसवर फोन येत होते तेव्हाच नाही म्हणून सांगितलं होतं. पण त्यांनी त्यांचं हॉटेल शोधलं. सुधा मूर्ती यायच्या आधीच हे तिथं पोहोचले. परत गेले.

योजना यादव पोस्टमध्ये पुढे म्हणतात की, सुधा मूर्ती दुपारी हॉटेलवर आल्या आणि रूमवर विश्रांतीला गेल्या. संध्याकाळी पाचला कार्यक्रम होता. हे तीन वाजल्यापासून लॉबीमध्ये ठाण मांडून बसले. शेवटी सुधाताईना मी मागच्या दरवाज्याने बाहेर काढलं. त्या गाडीत बसताना भिडेंचे कार्यकर्ते पळत आले, तर तिथून आम्हाला अक्षरशः गाडी दामटायला लागली. गाडीत त्या मला म्हणाल्या, कोण आहे ही व्यक्ती? त्यांना मी परिचय सांगितला. तर त्या थोड्या त्रासल्याच होत्या. म्हणाल्या, यांना मला भेटून काय करायचं आहे? ते त्यावेळी आम्हालाही माहीत नव्हतं. आम्ही हॉलवर पोहोचलो. कार्यक्रम वेळेत सुरू झाला.

योजना यादव पोस्टमध्ये पुढे म्हणतात की, आमचा नेहमीप्रमाणे कार्यक्रम सुरळीत सुरू होता. तिकडे भिडेंचे कार्यकर्ते हॉल बाहेर जमा व्हायला लागले. तस पोलिसांना टेन्शन येऊ लागलं. पोलिसांना फक्त काही अघटित घडू नये म्हणून काळजी घ्यायची होती. म्हणून ते आमच्या मागे लागले की तुम्ही दोन मिनिट भिडेना त्यांना भेटू द्या. कार्यक्रमाच्या मध्यात वाचकांना सोडून सुधा ताईंना उठायचं नव्हतं. तरी त्या नाईलाजाने उठल्या. आणि वैतागून भेटायला गेल्या. त्याआधी त्यांनी मला त्यांचं वय विचारलं फक्त. फार वयस्कर असतील तर त्या नमस्कार करतात म्हणून. त्यांना पाहिल्यावर ते त्यांना फार म्हातारे वाटले म्हणून त्यांनी त्यांना नमस्कार केला.

योजना यादव पोस्टमध्ये पुढे म्हणतात की, सुधाताईंनी मला हॉटेलवर परत जाते वेळी सांगितलं की भिडे त्यांना म्हणत होते की त्यांना दीड तास बोलायचं आहे. सुधाताई म्हणाल्या माझ्याकडे दीड मिनिटापेक्षा जास्त वेळ नाही. नंतर आमची सुधाताईंचा फोटो वापरून कसा प्रोपौगंडा होईल यावरही बोललो. सुधाताई म्हणत होत्या, ‘ योजना, अग अशा लोकांशी आपण काय बोलणार. त्यांना भेटायचं असेल आणि आपल्याला शक्य असेल तर भेटून घ्यायचं. आणि सोडून द्यायचं’ आणि एएनआय सारख्या मीडियाने ही अशी बातमी देणं म्हणजे सगळ्यात दुर्दैव आहे.