सहकारमंत्री सावे म्‍हणाले:पतसंस्थांमधील गैरव्यवहारासाठी तज्ज्ञ समिती स्थापन करणार

गेल्या काही दिवसांपासून पतसंस्थांमधील गैरव्यवहार आणि ठेवीदारांच्या ठेवी मिळण्यास येत असलेल्या अडचणी दूर करण्यासाठी राज्य शासनामार्फत पावले उचलण्यात येत आहेत. या अडचणी प्राधान्याने सोडवण्यासाठी सहकार क्षेत्रातील तज्ज्ञांचा समावेश असणारी नवीन समिती येत्या १५ दिवसांत स्थापन करण्यात येईल, असे सहकारमंत्री अतुल सावे यांनी शुक्रवारी विधानसभेत सांगितले. विधानसभा सदस्य बाळासाहेब थोरात, प्रकाश आबिटकर यांनी लक्षवेधी सूचनेद्वारे राज्यातील पतसंस्थांमध्ये झालेले गैरव्यवहार आणि अन्य कारणांमुळे ठेवीदारांच्या ठेवी मिळण्यास येणाऱ्या अडचणी याबाबतचा प्रश्न उपस्थित केला होता.

सहकारमंत्री सावे म्हणाले की, राज्यातील पतसंस्थांसाठी असणाऱ्या विविध मानकांचे नियमितपणे देखरेख करण्यासाठी वार्षिक आणि मासिक माहिती व्यवस्थापन प्रणाली लागू केली आहे. याशिवाय महाराष्ट्र सहकारी संस्था अधिनियमातील तरतुदींनुसार स्थिरीकरण व तरलता निधी स्थापन करण्यात आला आहे. या निधीसाठी नियामक मंडळाने ठरवलेल्या दराने व पध्दतीने पतसंस्थांनी अंशदान द्यावयाचे आहे. सद्यःस्थितीत हा दर १० पैसे प्रति १०० रुपये ठेव असा आहे, असेही ते म्हणाले.