आरोप:कालीचरण महाराज भगव्या कपड्यातील गुंड; आम्हाला बोलू द्या, पाहा कोण जिंकते : इम्तियाज जलील

कालीचरण महाराज सतत चिथावणीखोर वक्तव्ये करतात. ते भगव्या कपड्यातील गुंड असून त्यांची जागा जेलमध्येच आहे. आम्हाला बोलायची परवानगी द्या, मग पाहू कोण जिंकते. या लोकांना भगव्या कपड्याच्या आडून राज्यात आणि देशामध्ये धार्मिक तेढ निर्माण करायची आहे, असा आरोप छत्रपती संभाजीनगरचे एमआयएमचे खासदार इम्तियाज जलील यांनी रविवारी केला.

खा. इम्तियाज म्हणाले की, छत्रपती संभाजीनगर येथील दंगल ही पूर्वनियोजित होती. या दंगलीमागे राज्यातील सत्ताधाऱ्यांसह इतर पक्ष सामील आहेत. ज्या दिवशी ही दंगल घडली, त्या दिवशी संभाजीनगरमधील सर्व वरिष्ठ पोलिस अधिकारी कुठे होते आणि काय करत होते? याचे सीसीटीव्ही फुटेज तपासले तर सर्व काही सत्य समोर येईल. आमचा याप्रकरणात पोलिसांवर थेट आक्षेप आहेत. आम्ही ताकदवान आहोत, तर तुम्ही आमच्याकडे या

एमआयएम खा. इम्तियाज जलील यांनी केला अारोप

जर महाविकास आघाडीच्या नेत्यांना वाटत असेल आम्ही ताकदवान आहोत, तर त्यांनी आमच्याकडे यावे. खासदार असदुद्दीन ओवेसी यांचे नेतृत्व स्वीकारावे. तर आम्ही त्यांच्यासोबत जाऊ, असे म्हणत खासदार इम्तियाज जलील यांनी दुसऱ्यांदा महाविकास आघाडीला अशी ऑफर दिली आहे. भाजपला हरवण्यासाठी देशातील जे जे लोक प्रयत्न करत आहेत त्या लोकांसाठी आम्ही आमच्याकडून जी पाहिजे ती कुर्बानी देण्यासाठी तयार आहोत. केवळ त्यांनी समोर येऊन आमच्याशी चर्चा करायला हवी, असेही ते म्हणाले.