आपल्या शहरातील ताज्या बातम्या आणि ई-पेपर मिळवा मोफत

डाउनलोड करा

हनुमान चालिसाचा वाद:राणा दाम्पत्याचा मुक्काम बुधवारपर्यंत जेलमध्येच, न्यायालयाने जामिनावरील निकाल राखून ठेवला, 4 मे रोजी होणार निर्णय

मुंबईएका महिन्यापूर्वी
  • कॉपी लिंक
अपक्ष खासदार नवनीत राणा या मुंबईतील भायखळा महिला कारागृहात, तर त्यांचे आमदार पती रवी राणा तळोजा कारागृहात आहेत.

मुंबईच्या भायखळा महिला कारागृहात बंद असलेल्या अपक्ष खासदार नवनीत राणा आणि तळोजा कारागृहात असलेले त्यांचे आमदार पती रवी राणा यांच्या जामीन याचिकेवर आज निकाल आला नाही. न्यायालयाने त्यांच्या जामिनावरील निकाल राखून ठेवला असून राणा दाम्पत्यांना बुधवारपर्यंत जेलमध्येच राहावे लागणार आहे. जामीनाबाबतचा निर्णय 4 मे रोजी होणार आहे.

आज सायंकाळी 5 वाजता न्यायालय निकाल देण्याची शक्यता होती पण न्यायालयाच्या आजच्या निर्णयामुळे राणा दाम्पत्यांच्या अडचणीत कायम आहेत. गेल्या सुनावणीदरम्यान दोन्ही बाजूंचा युक्तिवाद ऐकून घेतल्यानंतर मुंबईच्या दिवाणी व सत्र न्यायालयाचे न्यायाधीश आर. एन. रोकडे यांनी सोमवारपर्यंत आदेश राखून ठेवला होता. आजही राणा दाम्पत्यांच्या जामिनावरील निर्णय राखून ठेवला आहे.

शुक्रवारी झालेल्या सुनावणीत दोन्ही बाजूंच्या वकिलांनी सुमारे अडीच तास युक्तिवाद केला. राणा दाम्पत्यावर धार्मिक भावना भडकावल्याचा आणि देशद्रोहाचा आरोप आहे. याशिवाय एका एफआयआरमध्ये त्यांच्यावर सरकारी कामात अडथळा आणल्याचा आरोपही आहे. राणा दाम्पत्याच्या वतीने रिझवान मर्चंट आणि अबाद पोंडा यांनी युक्तिवाद केला, तर मुंबईतील खार पोलिसांच्या वतीने सरकारी वकील प्रदीप घरत यांनी जामीन अर्जाला विरोध केला. नवनीत राणा आणि त्यांचे पती रवी राणा यांच्यावर आयपीसीच्या कलम 124-अ अंतर्गत देशद्रोहाचा गुन्हा दाखल करण्यात आला आहे.

रिझवान मर्चंट यांनी तुरुंग प्रशासनाला लिहिलेले पत्र.
रिझवान मर्चंट यांनी तुरुंग प्रशासनाला लिहिलेले पत्र.

जेलमध्ये नवनीत राणा यांची बिघडली प्रकृती
दरम्यान, राणा दाम्पत्याचे वकील रिजवान मर्चंट यांनी कारागृह अधीक्षकांना पत्र लिहून नवनीत राणाला स्पॉन्डिलोसिसचा त्रास होत असून त्यांची समस्या सातत्याने वाढत असल्याचे म्हटले आहे. त्यामुळे त्यांना तातडीने वैद्यकीय मदतीची गरज आहे. विशेष म्हणजे रिजवानने हे पत्र 29 एप्रिल रोजी लिहिले होते, मात्र अद्यापपर्यंत कारागृह प्रशासनाने यावर कोणतीही कारवाई केलेली नाही. एखाद्या लोकप्रतिनिधीची प्रकृती गंभीर झाल्यास त्याला जेल प्रशासन जबाबदार असेल, असेही रिजवानने म्हटले आहे. या पत्राची प्रत त्यांनी लोकसभा अध्यक्ष ओम बिर्ला यांनाही पाठवली आहे.

यामुळे मुंबई पोलिसांचा जामिनाला विरोध

न्यायालयात जामिनाला विरोध करताना मुंबई पोलिसांनी सांगितले की, नवनीत राणा यांच्यावर गंभीर आरोप आहेत. राणा दाम्पत्य तुरुंगातून बाहेर पडून खटल्यावर प्रभाव टाकू शकते, असा सरकारचा युक्तिवाद आहे. कलम 149ची नोटीस असतानाही राणा दाम्पत्याने एका मुलाखतीत राज्य सरकारला खुले आव्हान दिल्याचेही पोलिसांच्या वतीने सांगण्यात आले. हे प्रकरण सांगितले जातेय तितके सरळ आणि साधे नाही.

राणा दाम्पत्याचा उद्देश केवळ हनुमान चालिसा वाचणे हा नव्हता. कायदा आणि सुव्यवस्था बिघडवून ठाकरे सरकारला आव्हान देण्याचा त्यांचा हेतू होता. राज्यातील महाविकास आघाडी सरकारच्या अस्तित्वालाच आव्हान देण्याचा डाव राणा दाम्पत्याने रचला होता, असाही आरोप आहे.

पोलिसांनी आधीच कलम 149 अन्वये नोटीस देऊन त्यांना रोखण्याचा प्रयत्न केला असता, त्यांनी मातोश्रीबाहेर हनुमान चालिसा वाचण्याचा आग्रह का धरला? कारण ते अराजकतेची स्थिती निर्माण करू पाहत होते.

बचाव पक्षाचा असा होता युक्तिवाद

दुसरीकडे राणा दाम्पत्याच्या वकिलांनी युक्तिवाद करताना सांगितले की, राणा दाम्पत्य हे जबाबदार नागरिक असून ते प्रत्येक अटी पाळतील. सुनावणीदरम्यान वकिलांनी देशद्रोहाच्या आरोपावरही प्रश्नचिन्ह उपस्थित केले. यादरम्यान वकिलांनी राणा दाम्पत्याच्या 8 वर्षांच्या मुलीचाही संदर्भ दिला. मुख्यमंत्र्यांच्या खासगी निवासस्थानाजवळ हनुमान चालिसाचे पठण करून द्वेष निर्माण करण्याचा याचिकाकर्त्यांचा हेतू नसल्यामुळे कलम 153 (ए) अंतर्गत आरोप कायम ठेवता येणार नाही, असे राणा दाम्पत्याने याचिकेत म्हटले आहे.

यावरून सुरू झाला वाद

नवनीत राणा यांनी मुख्यमंत्री उद्धव ठाकरे यांचे निवासस्थान असलेल्या मातोश्रीबाहेर हनुमान चालिसाचे पठण करणार असल्याची घोषणा केल्याने संपूर्ण वादाला सुरुवात झाली. या घोषणेनंतर शिवसेनेच्या शेकडो कार्यकर्त्यांनी नवनीत राणांविरोधात निदर्शने केली. त्यानंतर अमरावती लोकसभा मतदारसंघाचे खासदार नवनीत राणा आणि बडनेराचे आमदार पती रवी राणा यांनी मात्र 23 एप्रिल रोजी मातोश्रीबाहेर हनुमान चालिसाचे पठण करण्याची त्यांची योजना रद्द केली. मात्र, पोलिसांनी त्यांना अटक करून कारागृहात पाठवले. सध्या 6 मेपर्यंत ते न्यायालयीन कोठडीत आहे.

बातम्या आणखी आहेत...