फडणवीसांच्या भेटीनंतर रामदास आठवले:म्हणाले - 'शिवसेनेत अंतर्गत वाद सुरू असून आम्ही "वेट अँड वॉच"च्या भूमिकेत

शिवसेनेत अंतर्गत वाद सुरू असून आमचा काही संबंध नाही. आम्ही सध्या वेट अँड वॉचच्या भूमिकेत आहोत, अशी प्रतिक्रिया रामदास आठवले यांनी दिली आहे. विरोधीपक्ष नेते देवेंद्र फडणवीस यांची भेट घेतल्यानंतर त्यांनी माध्यमांशी संवाद साधला.

रामदास आठवले म्हणाले की, एकनाथ शिंदेकडून आम्हाला प्रस्ताव नाही. पण, सरकार अल्पमतात आहे, त्यामुळे सरकारला सत्तेत राहण्याचा अधिकार नाही. एकनाथ शिंदे यांच्याकडे जास्त आमदारांची संख्या आहे. त्यामुळे मोठा गट हा एकनाथ शिंदे यांचा आहे. त्यामुळे मविआ नेत्यांनी आपल्याकडे जास्त संख्याबळ असल्याचा दावा करणे अयोग्य आहे. याशिवाय, 16 आमदारांना निलंबित करण्याचा प्रयत्न करण्यात येत आहे. पण, त्यांना निलंबित करता येणार आहे. त्यांच्या आमदारकीला धक्का लागू शकत नाही.

आठवले म्हणाले की, एकनाथ शिंदेंना सुरक्षा मिळाली पाहिजे. शिवसैनिकांची गुंडागर्दी चालली आहे. ते फक्त तोडफोड करू शकतात असे नाही. दादागिरी करणे योग्य नाही. त्याला दादागिरीने उत्तर दिले जाऊ शकते. पोलिसांसमोर बोर्ड तोडले जात असतील तर ते योग्य नाही. शिवसैनिकांना शांतता बाळगण्याचे आवाहन शिवसेना पक्षप्रमुख उद्धव ठाकरेंनी केले पाहिजे.

शिवसेना अ‍ॅक्शन मोडमध्ये

एकनाथ शिंदे यांनी केलेल्या बंडानंतर पक्ष वाचवण्यासाठी शिवसेनेकडून वेगाने पावले उचलली जात आहे. विधानसभा उपाध्यक्ष नरहरी झिरवाळ यांनी शिंदे यांच्या गटातील 16 आमदारांना अपात्रतेची नोटीस दिली आहे. या नोटिशीविरोधात एकनाथ शिंदे आता सुप्रीम कोर्टात धाव घेण्याच्या तयारीत असल्याची माहिती आहे. शिवसेनेने विधानसभा उपाध्यक्षांची भेट घेत बंडखोर आमदारांना अपात्र ठरवण्याची मागणी केली होती. काही दिवसांपूर्वी 12 आमदारांना अपात्र ठरवण्याची मागणी केली होती. त्यानंतर शुक्रवारी आणखी चार आमदारांना अशा एकूण 16 आमदारांना अपात्र ठरवण्याची मागणी त्यांनी केली होती. त्यानंतर विधानसभा उपाध्यक्षांनी बंडखोर गटातील 16 आमदारांना अपात्रेची नोटीस बजावली. त्यानंतर आता शिंदे गटाने या नोटीशीला आव्हान देण्याचा निर्णय घेतला आहे.