कोंडी:महाराष्ट्रात गृहमंत्र्यांच्या नावाने मोगलाई; संजय राऊतांचे देवेंद्र फडणवीसांना पत्र; मोहित कंबोजांवर कारवाई कधी? थेट सवाल

महाराष्ट्रात गृहमंत्र्यांच्या नावे मोगलाई सुरू आहे. भाजपचे नेते कायद्यापेक्षा मोठे आहेत का, असा थेट सवाल शिवसेनेच्या ठाकरे गटाचे नेते आणि खासदार संजय राऊत यांनी उपमुख्यमंत्री व गृहमंत्री देवेंद्र फडणवीस यांना एक खरमरीत पत्र पाठवून केला आहे.

पुणे पोलिसांनी ऑस्कर पुरस्कार विजेता संगीतकार ए. आर. रहमान यांना रात्री दहा वाजेनंतर कार्यक्रम करू दिला नाही. मात्र, भाजपचा नेता पहाटे साडेतीनपर्यंत बारमध्ये नाचतो. कायदा सर्वांना समान नाही का, भाजपचे नेते कायद्यापेक्षा मोठे आहेत का, अशा फैरीही राऊत यांनी झाडल्यात.

कंबोज मद्यधुंद अवस्थेत

संजय राऊत आपल्या पत्रात म्हणतात की, २९ एप्रिल २०२३ रोजी पहाटे लिंक रोड, खार पश्चिम येथे घडलेल्या घटनेकडे मी आपले लक्षवेधीत आहे. मुंबईत रेस्टॉरंट द्वार साधारण १ वाजेपर्यंत चालू ठेवण्याची परवानगी असताना सदर 'रेडिओ' बार पहाटे ३.३० वाजेपर्यंत चालू होता व आतील गाण्यामुळे आजूबाजूच्या परिसरात त्रास होऊ लागला. बाहेर ट्रॅफिक जाम झाले म्हणून संभाजी ब्रिगेडचे सचिन कांबळे हे आत जाऊन विनंती करू लागले. तेव्हा त्यांच्यावरच जबरदस्ती व धक्काबुकीचा प्रयत्न झाला. बारमध्ये मोठ्या प्रमाणात मुली होत्या व त्यांच्या गराड्यात भाजपचे एक तरुण नेते मोहित कंबोज हे मद्यधुंद अवस्थेत होते.

पोलिस दबावाखाली आले

संजय राऊत आपल्या पत्रात पुढे म्हणतात की, श्री. कांबळे यांनी पोलिसांना पाचारण केले, पण मोहित कंबोज हे वर्दीतल्या पोलिसांशी दादागिरीच्या भाषेत अर्वाच्य पध्दतीने बोलू लागले. काही पोलिसांना धमक्या दिल्या. "हिंमत असेल तर मला येथून बाहेर काढून दाखवा मी आता देवेंद्रला फोन करतो बघा." असे तो राज्याच्या गृहमंत्र्यांच्या नावाने धमकावू लागला व पोलिस हतबलतेने हा सर्व तमाशा अपमानित होऊन पाहत राहिले. पोलिसांसमोर कंबोज हे त्याही अवस्थेत दारू पित राहिले. याबाबतचे हॉटेल व बाहेरचे सीसी टीव्ही फुटेज त्वरित पोलिसांनी जप्त करावेत. कंबोज हे वारंवार देवेंद्र फडणवीस, अमित शहा यांचा उल्लेख करीत असल्याने पोलिस दबावाखाली आले. ही बाब कायदा आणि सुव्यवस्थेच्या दृष्टीने गंभीर आहे.

कारवाईची केली मागणी

संजय राऊत आपल्या पत्रात पुढे म्हणतात की, महाराष्ट्रात गृहमंत्र्यांच्या नावाने मोगलाई सुरू असल्याचे दिसून येते. 'रेडिओ बार अंमली पदार्थाचे सेवन, विक्री तसेच पिकअप पॉइंट म्हणून कुप्रसिद्ध आहे. शनिवारी पहाटेपर्यंत येथे बेकायदेशीरपणे अंमली पदार्थाचे सेवन, विक्री सुरू होती व भाजपचे एक नेते तेथे मद्यधुंद अवस्थेत उपस्थित होते व गृहमंत्र्यांच्या नावाने पोलिसांना धमकावत होते. ही बाब गंभीर आहे. खार पश्चिमेचा रेडिओ बार कोणाच्या मालकीचा आहे. त्याचा तपास करून पोलिसांना धमकावणाच्या भाजप नेत्यावर गुन्हा दाखल करून त्वरित कारवाई व्हावी व नियम मोडणाच्या संबंधित रेडिओ बारचा परवाना रद्द करावा. गृहमंत्री म्हणून आपल्या प्रतिष्ठेचा विषय असल्याने मी ही तक्रार करीत आहे.

संबंधित वृत्तः

कारवाईची मागणी:भाजप नेते मोहित कंबोज बेधुंद अवस्थेत मुलींबरोबर, तपास करा, गृहमंत्री कोणाच्या खिशात? राऊतांचा आरोप

आनंदावर विरजण:सुप्रसिद्ध संगीतकार ए. आर. रहमान यांचा पुण्यातला शो पोलिसांनी पाडला बंद; नेमके कारण काय?