खोचक टोला:डोनाल्ड ट्रम्प आता भाजपात प्रवेश करतील, त्यांचे 'सुटबूट' भाजपच्या वॉशिंग मशीनमध्ये स्वच्छ केले जातील- ठाकरे गट

अमेरिकेचे माजी राष्ट्राध्यक्ष डोनाल्ड ट्रम्प यांच्यावर सध्या अमेरिकेत अटकेची टांगती तलवार आहे. पॉर्न स्टारला चुकीच्या पद्धतीने पैसे दिल्याचा आरोप त्यांच्यावर आहे. यावरुन ठाकरे गटाने भाजपला खोचक टोला लगावला आहे. डोनाल्ड ट्रम्पही आता दिल्लीत येऊन भाजपात प्रवेश करतील व त्यांचे ‘सूटबूट’ भाजपच्या वॉशिंग मशीनमध्ये टाकून स्वच्छ केले जातील, असे ठाकरे गटाने म्हटले आहे.

CBI, ED ने ट्रम्प यांच्या कपड्यांना इस्त्री करावी

ठाकरे गटाचे मुखपत्र असलेल्या सामनाच्या अग्रलेखात म्हटले आहे की, पंतप्रधान मोदी यांचे सीबीआयच्या स्थापना दिनानिमित्ताने केलेले भाषण भ्रष्टाचार मोडून काढणारे नसून यंत्रणांच्या मनमानीस उत्तेजन देणारे आहे. भाजप तुमच्या पाठीशी आहे, आमच्या विरोधकांना सोडू नका, असा संदेश देणारे आहे. अमेरिकेत डोनाल्ड ट्रम्प यांच्यावरही अटकेची टांगती तलवार आहे. त्यामुळे ट्रम्पही आता भाजपात प्रवेश करतील. त्यांना भाजपच्या वॉशिंग मशीनमध्ये टाकून स्वच्छ केले जाईल. सीबीआय, ईडीने फक्त कपडे वाळत घालून त्यास कडक इस्त्री वगैरे करण्याचे काम करावे. मोदींचा संदेश स्पष्ट आहे. भ्रष्टाचारी फक्त भाजपातच राहतील व त्यांना अभय मिळेल.

मेहुल चोक्सी, नीरव मोदी काय दुधाने स्थान करताय

अग्रलेखात म्हटले आहे की,सीबीआयचा पोपट पिंजऱ्यातच मालक सांगेल त्याप्रमाणे ‘विटू विटू’ किंवा ‘मिठू मिठू’ करीत आहे. ईडी आणि सीबीआय या दोन्ही यंत्रणा आज मोदींच्या ढवळ्या-पवळय़ाप्रमाणेच काम करीत आहेत. मोदी म्हणतात, ‘भ्रष्टाचाऱ्यांना सोडू नका.’ याचा अर्थ (असा की) जे भाजपात आहेत असे भ्रष्टाचारी किंवा ज्यांनी भाजपात प्रवेश करून गंगास्नान केले असे सोडून बाकी सगळे भ्रष्टाचारी आहेत व सीबीआय-ईडीने त्यांना सोडू नये. मोदी म्हणतात, ‘सीबीआयने काळ्या पैसेवाल्यांवर कारवाई केली.’ मग मेहुल चोक्सी, नीरव मोदींवर कारवाई का केली नाही? ते काय पांढऱ्या दुधाने स्नान करीत आहेत.

अदानी-मोदी हे बंधुतुल्य नात्याने बांधले गेले

अग्रलेखात म्हटले आहे की, अदानी महाशयांनी ‘शेल’ म्हणजे खोट्या कंपन्यांच्या माध्यमातून 42,000 कोटींचे काळे धन आपल्या कंपन्यांत आणले. सीबीआयने त्यावर काय कारवाई केली? शिवसेनेतून ‘फुटलेले’ 5 खासदार व 9 आमदार असे आहेत की ते सीबीआय आणि ईडीच्या हिटलिस्टवर होते. आता त्यांनी शिवसेना सोडताच सीबीआय, ईडीने त्यांना भाजप वॉशिंग मशीनमध्ये टाकून एकदम पांढरेशुभ्र करून घेतले. जोपर्यंत भाजपकडे भ्रष्टाचार धुऊन काढण्याची वॉशिंग मशीन आहे तोपर्यंत पंतप्रधानांनी भ्रष्टाचार मोडून काढू वगैरे भाषा न वापरलेलीच बरी. त्यात त्यांचेच हसे होत आहे. स्टेट बँक, एलआयसी वगैरेंच्या पैशांची लूट अदानी यांनी केली व हा पैसा गरीब जनतेचाच होता. गरीबांचा पैसा लुटल्याबद्दल सीबीआयने तुमच्या अदानीवर काय कारवाई केली? अदानी हे अत्यंत शक्तिमान उद्योगपती आहेत. त्यामुळे सीबीआय त्यांच्यावर कारवाई करण्याची हिंमत दाखवणार नाही. पुन्हा अदानी-मोदी हे बंधुतुल्य नात्याने बांधले गेले आहेत. त्यामुळे राजकीय इच्छाशक्ती वगैरे शब्द वापरून मोदींनी भ्रम निर्माण करू नये.

मविआ पाडण्यासाठी 2 हजार कोटी कुठून आणले?

अग्रलेखात म्हटले आहे की, अग्रलेखात म्हटले आहे की, मोदी यांची रेकॉर्ड आजही 2014 च्याआधीच फिरत आहे. 2014 नंतरच्या घोटाळ्यांवर ते बोलायला तयार नाहीत. ‘राफेल’पासून अनेक घोटाळे मोदींच्या डोळय़ांसमोर घडले. विरोधकांच्या मागे ‘पेगॅसस’ लावले व त्यासाठी जनतेच्या तिजोरीतले शेकडो कोटी खर्च केले. आता अदानीचा घोटाळा समोर आला. महाराष्ट्राचे सरकार पाडण्यासाठी 2000 कोटी रुपये खर्च झाले. ते आणले कोठून? सीबीआय याचा तपास करणार आहे काय? लोकशाही व न्यायाच्या रस्त्यात भ्रष्टाचार हा अडथळा आहे याचा अनुभव सध्या शिवसेना घेत आहे.

कुठे गेला राधासुता तुझा धर्म?

अग्रलेखात म्हटले आहे की, राज्यपालांच्या घटनाबाह्य कृत्यांना न्यायालयाने संरक्षण दिले. राज्यातील सरकार पाडण्यास हातभार लावला. निवडणूक आयोगाने ‘शिवसेना’ हे नाव व धनुष्यबाणाचा सौदा करून न्याय विकला, तेव्हा कोठे गेला होता राधासुता तुझा धर्म? असे आज मोदींना विचारावेसे वाटते. पंतप्रधानमोदी यांचे सीबीआयच्या स्थापना दिनानिमित्ताने केलेले भाषण भ्रष्टाचार मोडून काढणारे नसून यंत्रणांच्या मनमानीस उत्तेजन देणारे आहे. भाजप तुमच्या पाठीशी आहे, आमच्या विरोधकांना सोडू नका, असा संदेश देणारे आहे. सीबीआय, ईडीसारख्या यंत्रणांची प्रतिष्ठा मागील सात-आठ वर्षांत साफ धुळीस मिळाली आहे व त्या यंत्रणांना स्वच्छ करणारे वॉशिंग मशीन अद्यापि निर्माण व्हायचे आहे.

भाजपमधील भ्रष्टाचाऱ्यांना अभय

अग्रलेखात म्हटले आहे की, कारवाया व अटका टाळण्यासाठी भ्रष्टाचारी मंडळी भाजपात प्रवेश करतात याचे मोदींना कौतुक वाटत असेल तर तो त्यांचा प्रश्न. अमेरिकेत डोनाल्ड ट्रम्प यांच्यावरही अटकेची टांगती तलवार आहे. मि. ट्रम्पही दिल्लीत येऊन भाजपात प्रवेश करतील व त्यांचे ‘सूटबूट’ भाजपच्या वॉशिंग मशीनमध्ये टाकून स्वच्छ केले जातील. सीबीआय, ईडीने फक्त कपडे वाळत घालून त्यास कडक इस्त्री वगैरे करण्याचे काम करावे. मोदींना नेमके हेच सांगायचे होते. संदेश स्पष्ट आहे. भ्रष्टाचारी फक्त भाजपातच राहतील व त्यांना अभय मिळेल.

संबंधित वृत्त

पॉर्न स्टार केस:डोनाल्ड ट्रम्प यांच्यावर 34 आरोप, मॅनहॅटन कोर्टात 57 मिनिटांची सुनावणी; ट्रम्प म्हणाले- कोणताही गुन्हा केला नाही

अमेरिकेचे माजी राष्ट्राध्यक्ष डोनाल्ड ट्रम्प यांच्यावर मंगळवारी मॅनहॅटन न्यायालयात 34 आरोप ठेवण्यात आले. पॉर्न स्टार स्टॉर्मी डॅनियल्सचे तोंड बंद करण्यासाठी पैसे दिल्याबद्दल आणि त्यासाठी व्यावसायिक रेकॉर्ड खोटे सिद्ध केल्याबद्दल ट्रम्प यांच्यावर कोर्टात खटला चालवला गेला. दरम्यान, डोनाल्ड ट्रम्प यांनी न्यायालयात सांगितले की, त्यांनी कोणताही गुन्हा केलेला नाही. तसेच त्यांच्या व्यवसायाच्या नोंदींमध्येही तफावत आढळलेली नाही. विशेष म्हणजे मॅनहॅटन कोर्टाने ट्रम्प यांच्या जामीन किंवा अटकेवर निर्णय दिला नाही. CNN च्या वृत्तानुसार, पुढील सुनावणी 4 डिसेंबरला होणार आहे. वाचा सविस्तर