राज्यात 340 तालुक्यांमध्ये 7,651 ग्रामपंचायतींसाठी 18 डिसें.ला मतदान:थेट सरपंच, सदस्य मतदान, 20 डिसेंबर रोजी मतमोजणी

राज्यातील ३४० तालुक्यातील ७ हजार ७५१ ग्रामपंचायतींच्या सदस्यपदांसह थेट सरपंचपदाच्या सार्वत्रिक निवडणुकीसाठी १८ डिसेंबर २०२२ रोजी मतदान होणार असल्याची घोषणा राज्य निवडणूक आयुक्त यू. पी. एस. मदान यांनी बुधवारी (ता.९) केली. या निवडणुकीची मतमोजणी २० डिसेंबर २०२२ रोजी होऊन निकाल घोषित केले जातील. निवडणूक जाहीर झाल्याने संबंधित गावांमध्ये आचारसंहिता तत्काळ लागू झाली आहे.

राज्यात ऑक्टोबर महिन्यात १ हजार ७९ ग्रामपंचायतींसाठी निवडणूक झाली होती. या ग्रामपंचायतींच्या निवडणूक निकालानंतर राजकीय पक्षात मोठी चढाओढ लागली होती. ग्रामपंचायत सदस्य आणि सरपंचपदाची निवडणूक राजकीय पक्षाच्या चिन्हावर लढवली जात नसतानाही भाजप, काँग्रेस, राष्ट्रवादी काँग्रेस आणि बाळासाहेबांची शिवसेना या पक्षांनी ग्रामपंचायत निवडणुकीत आपल्याच पक्षाला सर्वाधिक यश मिळाल्याचा दावा केला होता. आता ७ हजार ७५१ ग्रामपंचायत निवडणुकीच्या निमित्ताने ग्रामीण भागातील वातावरण तापणार असून राजकीय रणधुमाळी रंगणार आहे. ऑक्टोबर २०२२ ते डिसेंबर २०२२ या कालावधीत मुदत संपणाऱ्या, तसेच नव्याने स्थापित या सर्व ग्रामपंचायतींच्या निवडणुकांसाठी १८ नोव्हेंबर २०२२ रोजी संबंधित तहसीलदार निवडणुकीची नोटीस प्रसिद्ध करतील. निवडणूक होणाऱ्या ग्रामपंचायतींची जिल्हानिहाय संख्या : अहमदनगर- २०३ , अकोला- २६६ , अमरावती- २५७, औरंगाबाद- २१९, बीड- ७०४ , भंडारा- ३६३ , बुलडाणा- २७९, चंद्रपूर- ५९, धुळे- १२८ , गडचिरोली- २७ , गोंदिया- ३४८, हिंगोली- ६२, जळगाव- १४०, जालना- २६६ , कोल्हापूर- ४७५, लातूर- ३५१ , नागपूर- २३७, नंदुरबार- १२३, उस्मानाबाद- १६६, पालघर- ६३, परभणी- १२८, पुणे- २२१, रायगड- २४०, रत्नागिरी- २२२, सांगली- ४५२, सातारा- ३१९, सिंधुदुर्ग- ३२५, सोलापूर- १८९, ठाणे- ४२, वर्धा- ११३, वाशीम- २८७, यवतमाळ- १००, नांदेड- १८१ आणि नाशिक- १९६. एकूण- ७ हजार ७५१ निवडणुकांत सदस्य आणि सरपंच यांच्या निवडी एकाचवेळी होतील. थेट सरपंच निवडीचा कायदा पारित झाल्यावर प्रथमच मोठ्या संख्येने ग्रामपंचायत निवडणुका होत आहेत.

निवडणूक कार्यक्रम { उमेदवारी अर्ज : २८ नोव्हें. ते २ डिसेंबर { अर्ज छाननी : ५ डिसेंबर { अर्ज मागे : ७ डिसेंबर दु.३ वाजेपर्यंत { मतदान : १८ डिसेंबर { मतमोजणी : २० डिसेंबर