खून प्रकरण:नागपुरातील पवनकर हत्याकांड प्रकरणांत आरोपीचा गुन्हा सिद्ध; 11 एप्रिल रोजी सुनावणी होणार

नागपूर जिल्ह्यात गाजलेल्या बहुचर्चित पवनकर हत्याकांड प्रकरणांत आरोपीचा गुन्हा सिद्ध झाला आहे. मात्र हे दुर्मिळातील दुर्मिळ प्रकरण असून आरोपीला फाशीच हवे हे सरकारी पक्षाला सिद्ध करावे लागणार आहे.

या प्रकरणात पवनकर कुटुंबातील कमलाकर पवनकर, अर्चना पवनकर, मिराबाई पवनकर, वेदांती कमलाकर पवनकर, कृष्णा विवेक पालटकर या पाच जणांचा आरोपी विवेक गुलाबराव पालटकर याने खून केला होता. या प्रकरणांत विद्यमान जिल्हा न्यायाधीश आर. एस. पावसकर यांनी आरोपी विवेक गुलाबराव पालटकर याला 302 भादविमध्ये दोषी ठरविले आहे.

आरोपीला मृत्यूदंडाची शिक्षाच देण्यात यावी या करीता सरकारी पक्षाला हे दुर्मिळातील दुर्मिळ प्रकरण असल्याचे सिद्ध करायचे आहे. कारण सुप्रीम कोर्टाने फाशीच्या शिक्षेचे मापदंड आखून दिले आहे. त्या बाबींची पूर्तता करण्यासाठी सरकारी पक्ष आणि आरोपीला स्वतःच्या बचावा करीता 11 एप्रिल रोजी सुनावणी होणार आहे. या खटला सरकारी पक्षातर्फे सहाय्यक सरकारी वकील अभय जिकार यांनी हाताळला आणि प्रकरणाचा तपास मुकंद एम. साळुंके यांनी केला.

गुन्हाची थोडक्यात हकीकत अशी की, मृतक कमलाकर पवनकर हा आरोपी विवेक पालटकर यांचा साळा आहे. एका खून प्रकरणांत आरोपीला जिल्हा न्यायालयाने जन्मठेोची शिक्षा सुनावली होती आणि विद्यमान उच्च न्यायालयाने आरोपी विवेक पालटकर याची निर्दोष सुटका केली होती .या सर्व कायदेशीर बाबी साठी मृतक कमलाकर पवनकर यांनी खर्च केला होता. आरोपी विवेक यांचे मुले वैष्णवी पालटकर (वय 8) आणि क्रिष्णा पालटकर (वय 4) हे 2014 पासून मृतक कमलाकर पवनकर यांच्याकडे आराधना नगर येथे राहत होते. तसेच आरोपीची शेती कमलाकर ठेक्याने लावत होते व आलेल्या पैशामधून मुलांचा आणि कोर्टाचा खर्च करीत होते.

आरोपी विवेक पालटकर 2017 मध्ये जेलमधून बाहेर आल्यानंतर तो काही दिवस मृतक कमलाकर पवनकर यांच्याकडे राहत होता व सेक्युरिटीमध्ये काम करीत होता. सहा महिन्यांपूर्वी त्याने खरबी नगर येथे रमेश गिरीपुंजे यांच्याकडे स्वतःचे खोटे नाव जिभकाटे सांगून किरायाने राहत होता.

याच दरमान्य आरोपीने स्वतःची शेती ठेक्याने दिली. त्यामुळे मृतक कमलाकर हे आरोपीला मुलांच्या पालन षोषणासाठी आलेला खर्च आणि कोर्ट कामाकरीता लागलेला खर्च 5 लाख मागत होता. तसेच आरोपी जेलमध्ये असताना मृतक कमलाकर याने सावत्र बहिणीला दोन एकराचा हिस्सा दिला होता. मृतक कमलाकर सुध्दा शेती विकून पैसे करीत होता.