भाजप-काँग्रेसमध्ये संघर्ष:महाविकास आघाडीच्या ‘वज्रमूठ’ सभेवरून भाजप नेत्यांमध्ये दुमत

महाविकास आघाडीच्या “वज्रमूठ’ सभेवरून भाजप नेत्यांमध्ये दुमत असून भाजप-काँग्रेसमध्ये संघर्ष उफाळून आला आहे. महाविकास आघाडीची नागपूरला १६ एप्रिलला सभा आहे. सभेच्या मैदानावरून भाजपचे आ. कृष्णा खोपडे यांनी सभेला विरोध केला आहे. मात्र खोपडे यांचा विरोध म्हणजे भाजपचा विरोध असे चित्र लोकांपुढे जात असल्याने भाजप प्रदेशाध्यक्ष चंद्रशेखर बावनकुळे व शहराध्यक्ष आ. प्रवीण दटके यांनी भाजपचा मविआच्या सभेला विरोध नाही, असे स्पष्ट केले. पण दुसरीकडे खोपडे माघार घेण्यास तयार नाहीत. त्यांनी ज्या भागात सभा होणार आहे त्या भागातील नागरिकांना सोबत घेऊन आंदोलन सुरू केले आहे. मात्र या विरोधाला न जुमानता मंगळवारी दुपारी सभेचे मुख्य संयोजक सुनील केदार यांच्यासह काँग्रेस नेत्यांनी मैदानाची पाहणी करत सभा होणारच, हे स्पष्ट केले.

काँग्रेसचे आ. अभिजित वंजारी यांनी गरज भासल्यास आमदार निधीतून मैदान चांगले करून देऊ, असे सांगितले. या भागात सभेला कोणाचाही विराेध नाही. उलट उद्धव ठाकरे, अजित पवार आदींना ऐकण्यास लोक उत्सुक असल्याने सभा होईल, असे ठणकावून सांगितले. भाजपच्या स्थानिक नेत्याचा विरोध असतानाही काँग्रेसच्या नेत्यांनी दर्शन कॉलनीच्या मैदानावर वज्रमूठ सभेसाठी सुरू करण्यात आलेल्या तयारीचा आढावा घेतला. नागपुरातील वज्रमूठ सभेची जबाबदारी असलेले माजी मंत्री सुनील केदार, जिल्हा काँग्रेसचे अध्यक्ष राजेंद्र मुळक, आ. अभिजित वंजारी यांच्यासह मोठ्या संख्येने स्थानिक नेत्यांनी मैदानावर पाहणी केली.

सभा हवेत नाही, जमिनीवर हाेतात आमच्या सभेला स्थानिक नागरिकांचा विरोध असल्याचे सांगितले जात असले, तरी आम्हाला कुठेही विरोध दिसत नाही. काही अटी-शर्तींसह आम्हाला नागपूर सुधार प्रन्यासने मैदानावर राजकीय सभेची परवानगी दिली आहे. आम्ही त्या अटी-शर्तींचे पालन करू. आम्ही व्यासपीठ उभारण्यासाठीसुद्धा मैदानावर खड्डे खोदत नाही. मैदानाचे नुकसान होणार नाही याची आम्ही काळजी घेऊ, असे संयोजक सुनील केदार यांनी सांगितले. कोणतीही राजकीय सभा जमिनीवरच होऊ शकते. हवेत होऊ शकत नाही. त्यामुळे राजकीय सभा घ्यायची असल्यास कुठले तरी मैदान घ्यावेच लागेल, अशा शब्दांत महाविकास आघाडीतील स्थानिक नेत्यांनी भाजपला उत्तर दिले.