पोलिसांची अनोखी कारवाई:महिला पोलिस कॉन्स्टेबलने प्रेमिका होऊन केली घरफोड्याला अटक; आरोपी अलगद जाळ्यात

एका घरफोड्याला पकडण्यासाठी एमआयडीसी पोलिसांनी वेगळीच शक्कल लढवली. घरफोड्याचा वीक पॉइंट ओळखून एका महिला पोलिस कॉन्स्टेबलने घरफोड्याशी संपर्क साधून त्याच्याशी प्रेमाच्या गोष्टी केल्या. नंतर त्याला भेटायला बोलावले. घरफोड्या येताच त्याला अटक केली. सोबत दोन अल्पवयीन आरोपींनाही ताब्यात घेतले आहे. एमआयडीसी पोलिसांकडून मिळालेल्या माहितीनुसार सहकार नगर निवासी संजय रतनकुमार चौधरी (५३) यांच्या कंपनीतून आरोपींनी लाखोच्या मालाची चोरी केली. आरोपी अंकेश उर्फ टोबो रामसिंह पाल व त्याच्या सहकाऱ्यांनी ही चोरी केली असून ते फरार असल्याची माहिती गुप्त बातमीदाराने दिली. तपासी हवालदाराने या चोरीचा तपास करताना आरोपीची पूर्ण माहिती मिळवली. यात माहिती काढली असता मुख्य आरोपी टोबो हा त्याच्या दोन गर्लफ्रेंडसोबत तासनतास बोलत असल्याची माहिती मिळाली. त्याची कमजोरी समजताच एमआयडीसी पोलिसांनी या कमजोरीचा लाभ घेण्याचा निर्णय घेतला. वेश बदलून सापळा रचला.

एका महिला पोलिस शिपायाने त्याच्याशी संपर्क साधून त्याला बोलण्यात गुंतवून ठेवले. आपल्या जाळ्यात नवी प्रेमिका फसल्याचे टोबोला वाटले. त्यानंतर अनेकवेळा टोबोने फोन केल्यानंतर प्रेमिका झालेल्या महिला शिपायाने त्याला लोकमान्य नगर मेट्रो स्थानकावर भेटायला बोलावले. जाळ्यात येऊन टोबो तिथे पोहोचला व त्याने महिला कॉन्स्टेबलशी बोलणे सुरू केले. तेथे साध्या वेशात फिरत असलेल्या पोलिसांनी त्याला पकडले. त्याच्यासोबत दोन अल्पवयीन साथीदारांनाही ताब्यात घेतले. त्याच्या जवळून ९६ हजाराचा माल जप्त केला.