अपघात:उभ्या टेम्पोला दुचाकी धडकली; दोन जण ठार; नांदेड जिल्ह्यातील सिबदरा (ज.) येथील घटना

हिमायतनगर शहरातून बाजार करून सोमवारी सायंकाळी गावाकडे निघालेल्या सिबदरा (ज.) येथील दोघांचा दुचाकी टेम्पोला धडकून मोठा अपघात घडला. या अपघातात एक जण जागीच ठार झाला, तर दुसऱ्याचा उपचार सुरू असताना मृत्यू झाला. ही घटना सोमवारी रात्री घडली. माधव बाचकलवाड (४२) आणि देविदास बालाजी गोसलवाड(२७) अशी मृतांची नावे आहेत.

गोपाळ व देविदास दुचाकीवर हिमायतनगरहून सिबदरा गावाकडे निघाले होते. त्यांची दुचाकी वडगाव गावाजवळील मुख्य रस्त्यावर असलेल्या हनुमान मंदिराजवळ आली असता उभ्या असलेल्या पिकअप टेम्पोवर धडकली. या घटनेत गोपाळ बाचकलवाड यांचा मृत्यू झाला, तर देविदास गोसलवाड यांना जखमी अवस्थेत नांदेड येथे रुग्णालयात दाखल करण्यासाठी घेऊन गेल्यानंतर त्यांचा मृत्यू झाल्याचे डॉक्टरांनी घोषित केले. यातील गोपाळ बाचकलवाड यांच्या पश्चात पत्नी, एक मुलगा, मुलगी, आई असा परिवार आहे. तर देविदास गोसलवाड यांच्या पश्चात पत्नी, एक मुलगा, आई असा परिवार आहे. अपघातातील मृतांवर मंगळवारी (९ मे) दुपारी सिबदरा येथे शोकाकुल वातावरणात अंत्यसंस्कार करण्यात आले.