‎दिव्य मराठी एक्स्क्ल्युझिव्ह‎:70,411 घरगुती ग्राहकांना मिळणार 24 तास थ्री फेज वीज‎

सुधारित वितरण क्षेत्र (आरडीएसएस) योजनेंतर्गत सिन्नर‎ विधानसभा मतदारसंघासाठी ७० कोटी रुपयांचा आराखडा‎ तयार करण्यात आला आहे. ही योजना कार्यान्वित होताच‎ १४५ गावांतील शेतशिवारात घरगुती व व्यावसायिक‎ वापरासाठी २४ तास थ्री फेज वीज मिळणार आहे. आगामी‎ दोन वर्षांच्या आत हे काम पूर्ण हाेणार आहे.‎ मतदारसंघातील गावांमध्ये सिंगल फेज योजना आहे.‎ तथापि, शिवारातील अनेक वाडी-वस्त्यांवर ही योजना नाही.‎ शिवारात राहणाऱ्या शेतकऱ्यालाही घरगुती वापराची अखंडित‎ वीज मिळाली पाहिजे, या भावनेने केंद्र व राज्य सरकारच्या‎ प्रत्येकी ५० टक्के निधीतून आरडीएसएस योजना राबविण्यात‎ येत आहे. त्यातून सिन्नर मतदारसंघात हे काम होण्यासाठी‎ आमदार माणिकराव कोकाटे यांनी अधिकाऱ्यांकडे पाठपुरावा‎ आराखडा तयार करून घेतला. हे काम मंजूर झाले असून‎ निविदा प्रक्रिया पूर्ण होताच ते सुरू होणार आहे.‎

शिवारात‎ बहरेल‎ व्यवसाय‎
जागा असूनही केवळ विजेच्या उपलब्धतेअभावी शिवारात यंत्रावर चालणारे‎ व्यवसाय सुरू करण्यास शेतकऱ्यांना अडचणी येत आहेत. मात्र, हे काम‎ सुरू होताच वाड्या-वस्त्यांवर व्यवसाय करता येऊ शकणार आहे. शेतीवर‎ आधारित छाेटे-माेठे कारखाने यामुळे सुरू होऊ शकतील.‎

ग्रामीण भागाच्या विकासाला चालना‎
केंद्र व राज्य सरकारच्या संयुक्त तरतुदीतून राबविण्यात येणाऱ्या‎ आरडीसएस योजनेचा आराखडा बनवताना त्यात गावठाणासोबतच‎ वाड्या-वस्त्यांचाही त्यात समावेश करण्याची मागणी ऊर्जा विभागाच्या‎ अधिकाऱ्यांकडे केली होती. त्यानुसार कामे मंजूर झाली असून लवकरच‎ ही कामे सुरू होतील. ग्रामीण भागाच्या विकासाला चालना मिळेल.‎ - माणिकराव कोकाटे, आमदार, सिन्नर विधानसभा‎

१४५ गावे, वाड्या-वस्त्यांना २४ तास वीज..‎
आरडीएसएस योजनेचा आराखडा बनविताना गावठाणासोबतच‎ वाड्या-वस्त्यांचाही त्यात समावेश करण्याची सूचना आमदार कोकाटे‎ यांनी २१ सप्टेंबर २०२२ रोजी अधीक्षक अभियंता पडळकर यांच्या‎ दालनात झालेल्या बैठकीत केल्या होत्या. त्यानुसार या आराखड्यात‎ सिन्नर विधानसभा मतदारसंघातील १४५ गावे व त्यातील वाड्या-वस्त्यांत‎ घरगुती व व्यावसायिक ग्राहकांना २४ तास थ्री फेज वीज उपलब्ध‎ करण्याचा समावेश करण्यात आला. त्यासाठी नव्याने ५४ फीडर, २९४‎ रोहित्रे, जुन्या फीडरवर ६९ एचडीटी बसविण्यात येणार आहे.‎