घरफोड्या थांबवण्यासाठी:18 गावांमध्ये सीसीटीव्हीचा वॉच‎

नांदूरशिंगोटेसह परिसरातील गावांंमध्ये‎ वारंवार होणाऱ्या घरफोड्याचे प्रकार‎ थांबवण्यासाठी सीसीटीव्हीची उपाय योजना‎ करण्यात येणार आहे. नांदूरशिंगोटे पोलिस‎ चौकी अंतर्गत येणाऱ्या १८ गावांतील‎ पदाधिकाऱ्यांची वावी पोलिस ठाण्यात बैठक‎ पार पडली.‎ ग्रामीण पोलिस अधीक्षक शहाजी उमाप,‎ अप्पर पोलिस अधीक्षिका माधुरी कांगणे,‎ उपअधीक्षक सोमनाथ तांबे यांच्या‎ मार्गदर्शनाखाली ही बैठक घेण्यात आली.‎ सहायक पोलिस निरीक्षक सागर कोते यांनी‎ पदाधिकाऱ्यांना मार्गदर्शन केले. यावेळी‎ अधिकारी कर्मचारी उपस्थित होते.

नांदूरशिंगोटे व परिसरात दोन महिन्यांपासून‎ सातत्याने घरफोडीच्या घटना घडत आहेत.‎ त्यास आळा घालण्यासाठी ग्रामस्थांनी सजग‎ रहावे, संशयित व्यक्ती आढळल्यास‎ कळवावे, असे आवाहन सहायक निरीक्षक‎ कोते यांनी केले.‎ गावातील प्रमुख चौक, मार्ग महत्त्वाच्या‎ ठिकाणांवर सीसीटीव्ही बसविण्यात यावेत‎ अशी सूचना सरपंच, उपसरपंच, पोलिस‎ पाटील, ग्रामरक्षक दलाचे कार्यकर्ते यांना‎ करण्यात आली. या उपाययोजनेमुळे‎ चोरट्यांवर वचक निर्माण होईल, चोरीच्या‎ घटनातील संशयितांचा तपास लागण्यास‎ मदत होईल. त्यामुळे सीसीटीव्ही उपाय‎ महत्त्वपूर्ण असल्याचे मार्गदर्शन सागर कोते‎ यांनी केले.‎

महामार्गावर उपाय फायदेशीर‎
नाशिक-पुणे, सिन्नर-शिर्डी या महामार्गांवरील वावी पोलिस ठाण्याच्या हद्दीत‎ येणारे हॉटेल, ढाबे यावर सीसीटीव्ही बसवण्याच्या सूचना व्यावसायिकांना‎ यापूर्वी करण्यात आल्या होत्या. सहायक निरीक्षक सागर होते यांनी त्याची‎ अंमलबजावणी व्यावसायिकांकडून करून घेतली. त्यामुळे काही घटनांत‎ महामार्गावरील सीसीटीव्ही फायदेशीर ठरले आहेत. घटनांची उकल‎ करण्यास मदत झाल्याचे सहायक निरीक्षक कोते यांनी सांगितले.‎