उपोषण:चांदवडला कांदाप्रश्नी‎ शुक्रवारपासून उपोषण‎

कांदा भावातील घसरणीमुळे कांदा‎ उत्पादकांकडून तीव्र संताप व्यक्त‎ होत आहे. कांदाप्रश्नी केंद्र व राज्य‎ सरकारने ठोस भूमिका घेऊन‎ शेतकऱ्यांना मदत करावी यासाठी‎ झोपलेल्या सरकारला जाग‎ आण्यासाठी कांद्याला हमीभावासह‎ विविध मागण्यांसाठी दि. ३ मार्च‎ रोजी सकाळी १० वाजेपासून येथील‎ बाजार समितीत शेतकऱ्यांसमवेत‎ पक्षविरहित बेमुदत उपोषण करण्यात‎ येणार असल्याची माहिती माजी‎ आमदार शिरीषकुमार कोतवाल‎ यांनी पत्रकार परिषदेत दिली.‎ माजी आमदार कोतवाल म्हणाले‎ की, सद्यस्थितीत कांद्याला‎ उत्पादनखर्चाच्या तुलनेत‎ कवडीमोल भाव मिळत आहे.

दाेन‎ हजार रुपये क्विंटलला खर्च‎ येणाऱ्या कांद्याला ४०० रुपये क्विंटल‎ असा कवडीमोल भाव मिळत‎ असल्याने शेतकऱ्यांत तीव्र‎ संतापाची लाट उसळली आहे.‎ शेतकरी आर्थिक संकटात असताना‎ सरकारने शेतकऱ्यांना सबसिडी‎ देण्याऐवजी उलट शेतकरी केंद्र‎ सरकारला १६०० रुपये रिव्हर्स‎ सबसिडी देण्याचा हा प्रकार आहे.‎ हीच अवस्था द्राक्ष उत्पादकांचीही‎ असल्याने याबाबत गावागावात‎ बैठका घेऊन शेतकऱ्यांना संघटित‎ केले जात असून केंद्र व राज्य‎ सरकारविरोधात हे उपोषण करण्यात‎ येणार आहे. उपोषणादरम्यान‎ शेतकऱ्यांच्या निर्णयानुसार पुढील‎ आंदोलनाची दिशा ठरविली जाईल,‎ अशी माहिती माजी आमदार‎ कोतवाल यांनी यावेळी दिली. या‎ आंदोलनात सहभागी व्हावे, असे‎ आवाहन त्यांनी यावेळी केले.‎ यावेळी काँग्रेस तालुकाध्यक्ष संजय‎ जाधव, राष्ट्रवादी काँग्रेसचे विजय‎ जाधव, भीमराव जेजुरे, अ‍ॅड. अन्वर‎ पठाण, बापूसाहेब शिंदे, ओंकार‎ नेटारे आदी उपस्थित होते.‎