अभियान:धरण परिसरात स्वच्छता, 200‎ किलो प्लास्टिक केले जमा‎ ; पाणथळ दिनानिमित्त स्वच्छता

जागतिक पाणथळ दिनानिमित्त सिन्नर‎ महाविद्यालयाच्या छात्र सेनेच्या वतीने‎ सरदवाडी येथे पुनीत सागर अभियान‎ राबविण्यात आले. विद्यार्थ्यांनी धरण व‎ परिसरात स्वच्छता मोहीम राबवली.‎ यावेळी दाेन क्विंटल प्लॅस्टिक गोळा‎ करण्यात आले. एनसीसीच्या छात्रांनी‎ पाणथळ जागांच्या स्वच्छतेबाबत‎ जनजागृती केली.‎ सात महाराष्ट्र बटालियन एनसीसीचे‎ कमांडिंग ऑफिसर कर्नल तरुण खन्ना,‎ लेफ्टनंट कर्नल रवी व्यास,‎ महाविद्यालयाचे प्राचार्य डॉ. पी. व्ही.‎ रसाळ, उपप्राचार्य प्रा. आर. व्ही. पवार,‎ एनसीसी ऑफिसर लेफ्टनंट प्रा. संदीप‎ भिसे यांनी उपक्रमाबाबत मार्गदर्शन केले.‎ युवकांमध्ये जलस्रोत स्वच्छता,‎ परिसंस्थेची काळजी, पर्यावरणाचे महत्त्व,‎ पृथ्वीच्या स्वच्छतेची जबाबदारी वृद्धिंगत‎ करण्याचा उद्देश या उपक्रमाचा आहे.‎

एनसीसी ऑफिसर लेफ्टनंट संदीप भिसे,‎ ज्युनिअर अंडर ऑफिसर प्रणिता गांजवे,‎ रोशन घुले व छात्रांनी मोहिमेत सहभाग‎ घेतला. राष्ट्र स्वच्छता, जाणीव जागृती हा‎ संदेश देण्यात आला. ‘प्रदूषण मुक्त‎ जलस्रोत प्रत्येक नागरिकाची जबाबदारी''‎ हा संदेश राष्ट्रीय छात्र सेना या जागतिक‎ पाणथळ दिनानिमित्त देण्यात आला.‎ धरणातील पाण्याच्या कडेला वाहून‎ आलेला कचरा, धरणाची भिंत व‎ परिसरातील प्लॅस्टिक बाटल्या, पिशव्या‎ यांचे संकलन करण्यात आले. दोन‎ क्विंटलपेक्षा अधिक प्लास्टिक धरणाच्या‎ जलस्रोतामधून संकलित करण्यात आले.‎ जमा केलेला कचरा नगरपरिषदेच्या‎ आरोग्य विभागाच्या गाडीत टाकून कचरा‎ डपोत पाठविण्यात आला.‎