दिव्य मराठी विशेष:अमृत महोत्सवानिमित्त सांस्कृतिक कार्यक्रमाची रंगत‎

नाद एकच, एकच, बैलगाडा‎ शर्यत... गाण्यावर जोरदारपणे‎ रंगलेला नृत्याविष्कार, त्यास‎ प्रेक्षकांचा टाळ्यांचा कडकडाटात‎ जोरदारपणे मिळणारा प्रतिसाद,‎ ग्रामस्थ आणि पालकांकडून‎ विद्यार्थ्यांवर होणारी बक्षिसांची‎ लयलूट, मधूनच दर्दींकडून वन्स‎ मोअरचा आग्रह, असा संगीतमय‎ माहोल घोटेवाडी जिल्हा परिषद‎ शाळेत अनुभवयास मिळाला.‎ निमित्त होते जिल्हा परिषद‎ प्राथमिक शाळेच्या अमृत‎ महोत्सवानिमित्त आयोजित‎ करण्यात आलेल्या वार्षिक‎ स्नेहसंमेलनाचे आणि शाळा‎ विकासात योगदान देणाऱ्या‎ देणगीदारांच्या सन्मानाचे.‎

व्यासपीठावर सातपूर पोलिस‎ स्टेशनचे पोलिस निरीक्षक सतीश‎ घोटेकर, वावीचे सहायक पोलिस‎ निरीक्षक सागर कोते, दिव्यांग‎ कर्मचारी आणि अधिकारी‎ संघटनेचे राज्य सचिव ललित‎ सोनवणे, प्राथमिक शिक्षक‎ समितीचे जिल्हाध्यक्ष आनंदा‎ कांदळकर, शिक्षक संघाचे‎ तालुकाध्यक्ष संजय भोर, केंद्रप्रमुख‎ संदीप लेंडे, सरपंच मंजुश्री भरत‎ घोटेकर, उपसरपंच रंजना घोटेकर,‎ चंद्रभान घोटेकर, सिन्नर रोडवेजचे‎ दत्ताशेठ ढमाले, बांधकाम‎ व्यावसायिक नारायण सरोदे,‎ रामनाथ ढमाले, शाळा व्यवस्थापन‎‎‎‎‎‎‎‎‎‎‎ समितीचे अध्यक्ष वसंत ढमाले,‎ उपाध्यक्ष साईनाथ सरोदे, रघुनाथ‎ घोटेकर, रघुनाथ कांदळकर आदी‎ व्यासपीठावर उपस्थित होते.‎ सांस्कृतिक कार्यक्रमापूर्वी शाळा‎ विकासात योगदान देणाऱ्या सर्व‎ देणगीदारांना स्मृतिचिन्ह आणि शाल‎ देऊन सन्मान करण्यात आला.‎‎‎‎‎‎‎‎‎‎‎

कार्यक्रमासाठी मुख्याध्यापक संतोष‎ झावरे, शिक्षक पोपट नागरगोजे,‎ सुरेश दिघे, सुरेखा शेळके, शाळा‎ व्यवस्थापन समितीचे सदस्य व‎ तरुणांनी परिश्रम घेतले.‎ स्वॅग से करेंगे सबका स्वागत, ब्रुम‎ ब्रुम, देशभक्तीपर गीत, धनगर गीत,‎ महाराष्ट्राची लोकधारा, मैय्या‎‎‎‎‎‎‎‎‎‎‎ यशोदा, भीमगीत, राजं आलं राजं‎ आलं, फनी डान्स, नाद एकच‎ बैलगाडा शर्यत अशा एकाहून एक‎ सरस गीतांनी सांस्कृतिक‎ महोत्सवाची मैफल रंगत गेली.‎ उपस्थित ग्रामस्थांमधून ३० हजारांची‎ रोख बक्षिसे देऊन विद्यार्थ्यांच्या‎ कलागुणांना दाद देण्यात आली.‎

दातृत्वाची निकोप स्पर्धा...‎
गावातील देणगीदारांच्या आणि‎ ग्रामपंचायतीच्या निधीतून शाळेचे‎ रुपडे पालटले आहे. त्यासाठी‎ तब्बल ४ लाख १२ हजारांची रोख‎ स्वरूपात देणगी प्राप्त झाली.‎ व्यासपीठाचे छत आणि प्रवेशद्वार‎ यासाठी १ लाख १० हजारांचा खर्च‎ देणगीदारांनी केला. कार्यक्रमानंतर‎ संपूर्ण ग्रामस्थांना भोजन,‎ कार्यक्रमासाठी साऊंड सिस्टिम,‎ फोटो शूटिंग, प्रकाश व्यवस्था,‎ पाण्याचे जार याची संपूर्ण जबाबदारी‎ तरुणांनी उचलली. शाळेचा अमृत‎ महोत्सव लोक सहभागातून यशस्वी‎ करण्यासाठी देणगीदारांमध्ये‎ अक्षरशः स्पर्धा बघायला मिळाली.‎