आंदोलन स्थगित‎‎:पतसंस्थांना ठेवीची रक्कम‎ 31 मार्चनंतर मिळणार‎

नाशिक जिल्हा मध्यवर्ती सहकारी बँकेतून‎ सर्वप्रकारच्या ठेवी परत मिळाव्यात, या‎ मागणीसाठी नांदगाव तालुका शाखेतर्फे‎ नाशिक येथे गेल्या तीन दिवसांपासून‎ वस्त्रत्याग धरणे आंदोलन सुरू होते.‎ प्रशासनाने लेखी आश्‍वासन दिल्यानंतर‎ आंदोलन शनिवारी स्थगित करण्यात आले.‎ विभागीय सहनिबंधक कार्यालय, गडकरी‎ चौक,नाशिक येथे वस्त्रत्याग धरणे आंदोलन‎ सुरू करण्यात आले होते. सदर आंदोलनाच्या‎ मागण्यांची पूर्तता शनिवारी लेखी आश्‍वासन‎ देऊन करण्यात आली.‎ जिल्हा सहकारी बँकेच्या ठेवीदारांना‎ येत असलेल्या अडचणीतून मार्ग‎ काढण्यासाठी बँकेने प्रभावशाली व मोठ्या‎ थकबाकीदारांकडून वसुली मोहीम सुरू केली‎ आहे.

३१ मार्चपर्यंत प्राप्त होणाऱ्या थकबाकी‎ वसुलीतून सर्व ठेवीदार व पतसंस्थांना ठेवीची‎ रक्कम परत करण्यासाठी सम न्यायिक‎ पध्दतीने धोरण ठरवून त्याची अंमलबजावणी‎ करून ३१ मार्चनंतर वितरण करण्यात येईल,‎ असे लेखी पत्र जिल्हा बँकेच्या मुख्य‎ कार्यकारी अधिकाऱ्यांनी आंदोलनकर्त्यांना‎ दिले आहे. सहकार आयुक्त पुणे यांच्या‎ प्रमुख उपस्थितीत आंदोलनाचे राज्य उपाध्यक्ष‎ अशोक सब्बन यांच्याशी चर्चा केल्यानंतर १५‎ एप्रिलपर्यंत सदर आंदोलन स्थगित करण्यात‎ आले आहे.‎ नाशिक येथे करण्यात आलेल्या या‎ वस्त्रत्याग धरणे आंदोलनात मनमाड येथील‎ पदाधिकारी तीन दिवसांपासून सहभागी झाले‎ होते.त्यांना पतसंस्था फेडरेशनने पाठिंबा दिला‎ होता. तालुकाप्रमुख भिमराज लोखंडे, सचिव‎ भास्कर झाल्टे, विष्णू चव्हाण, रामदास‎ दुभासे, सुनील म्हस्के, कादीर शेख यांनी‎ त्यात सहभाग घेतला होता.‎