पुष्पचक्र‎ अर्पण:जवान खंडू बरकले यांच्यावर‎ शासकीय इतमामात अंत्यसंस्कार‎

लेह (जम्मू काश्मीर) येथे कर्तव्य‎ बजावत असताना वीरमरण‎ आलेल्या आगासखिंड येथील‎ सैन्यदलातील जवान खंडू भागूजी‎ बरकले (५१) यांच्यावर रविवारी‎ (दि. १२) दुपारी शासकीय‎ इतमामात येथे अंत्यसंस्कार‎ करण्यात आले. यावेळी‎ कुटुंबासोबतच उपस्थितांना अश्रू‎ अनावर झाले होते. ‘शहीद जवान‎ खंडू भाऊ अमर रहे’ या घोषणांनी‎ परिसर दणाणून निघाला होता.‎ रविवारी सैन्यदलाचे सोपस्कार‎ पूर्ण करून चंदिगडवरून बरकले‎ यांचे पार्थिव विमानाने मुंबईला‎ आणण्यात आले.

तेथून‎ रुग्णवाहिकेतून गावाकडे आणले‎ गेले. बेलू फाटा येथे फुलांनी‎ सजवलेल्या व ‘शहीद जवान खंडू‎ बरकले अमर रहे’ असे फ्लेक्स‎ लावलेल्या लष्कराच्या गाडीतून हे‎ पार्थिव आगासखिंड गावात आणले‎ गेले. रस्त्याच्या दुतर्फा सडा,‎ रांगोळ्या काढण्यात आल्या होत्या.‎

‘आम्ही जातो तुमची कृपा असू‎ द्यावी, सकळा सांगावी विनंती‎ माझी’ हा तुकाराम महाराजांचा‎ वैकुंठगमनाचा अभंग त्याचप्रमाणे‎ टाळ व मृदंगाच्या गजरात येथील‎ भजनी मंडळांनी पार्थिवाचा सन्मान‎ केला.‎ अमर जवान खंडू बरकले यांचे‎ पार्थिव घराजवळ पोहोचताच‎ वीरपत्नी योगिता बरकले, भाऊ‎ रावसाहेब बरकले, नंदू बरकले, दामू‎ बरकले यांच्यासह त्यांचा मुलगा‎ ऋषिकेश, मुलगी रितू यांनी‎ शवपेटीला कवटाळत हंबरडा‎ फोडला. दुपारी अडीच वाजेच्या‎ सुमारास आगासखिंड येथील‎ शरदचंद्रजी पवार ग्रामसंस्कार‎ केंद्राच्या मोकळ्या पटांगणात‎ शासकीय इतमामात त्यांच्या‎ पार्थिवावर अंत्यसंस्कार करण्यात‎ आले. यावेळी सैन्यदलाचे लेफ्टनंट‎ कर्नल सतीश मिश्रा, सुभेदार आर.‎ के. पाठक, हवालदार विनोद पंडित,‎ नायक साहिल वर्मा, पप्पू शेखावत,‎ लान्सनायक सूरज सताळे, केशव,‎ सतीश कुमार, अजय कुमार,‎ यमनकुमार , रघुनाथ तुपे आदींनी‎ सशस्त्र सलामी दिली.‎ आमदार माणिकराव कोकाटे, माजी‎ आमदार राजाभाऊ वाजे, सिन्नर‎ पोलिस ठाण्याचे पोलिस निरीक्षक‎ राजेंद्र कुटे, सहायक पोलिस‎ उपनिरीक्षक गणेश परदेशी, नायब‎ तहसीलदार बाळासाहेब मुळे‎ यांच्यासह त्यांच्या कुटुंबियांनी‎ बरकले यांच्या पार्थिवास पुष्पचक्र‎ अर्पण केले.‎